燒雞翼好食, 釀入炒飯, 原來台灣夜市人氣熱爆, 前日開始, 香港都可以食到, 所以今日...「獨自去吃雞, 我寂寞找個伴」

燒雞翼炒飯, 台灣叫雞翅包飯, 完成製作過程後, 冷凍由台灣空運到港, 老闆阿Jack一邊燒雞翼, 一邊答:「前日第一日賣, 全日賣岀50隻, 依家只返一種嘅櫻花蝦味, 試試街坊反應先」

(原本台灣好多味嘅咩?) 試過十多款味道的Jack:「櫻花蝦最正, 淡淡地, 其他有泡菜味道又太濃, 紅蘿白, 青豆仲淡, 炸雞款式又好油..」(無得試, 我反而想食泡菜炸雞包飯...包頂頸)

店內有8種味粉可伴雞翼, 芝士、椒鹽、麻辣、檸檬、甘梅、蒜味、孜然、芥末和咖喱.

我叫阿Jack推介一款味道給我, 他說:「甘梅啦, 我最鍾意, 甜酸甜酸, 仲正過落蜜糖, 你信我...甘梅粉配雞翼入面啲紅油炒飯夾到不得了, 仲好食過配檸檬」(我好鍾意食烏梅...啱我呀!)

結果, 我一半保留原味, 一半配甘梅, 我一口咬入灑滿甘梅的一半, 配合滲滿雞味的炒飯, 本來:「唔夠瞓」的我, 也精神為之一振, 我直情可以用爽來形容, 愈食愈開心.

不過, 食完超滿足的甘梅味, 再食餘下的一半, ...奇怪...啖而無味, 剛才的興奮感覺盡失喎...

阿Jack:「哎呀! 我唔記得提你食咗原味先, 甘梅味道超濃, 所以你另外一半會變到無晒味喇...真係唔好意思」(早知唔好太心急, 家陣似去到紅館準備入場, 先發現唔記得帶飛囉)

試畢雞翼炒飯後, 當然要試試日賣300條的店舖皇牌雞腿捲, 今次阿Jack建議我配芝士, 椒鹽, 因為是所有味粉中最強烈的選擇. (今次老闆Jack話...就無分食邊半先喇!!)

其實, 客人最多可以配多少款味粉?? 阿Jack話:「客人都係揀一至兩款, 落齊8款都得嘅, 不過味道溝埋咁怪, 啃唔啃得落先? 暫時都無人試過揀兩款以上味粉喎」(可能只有我係咁貪心想落晒...無蝕底掛)

我一口大啖咬入雞腿捲, 嘩!好熱..好熱..好熱呀...(點解同頭先雞翅包飯一樣, 都係影完相即食, 雞腿捲熱得好緊要)

阿Jack解釋:「頭先你食嘅雞翼, 係開口燒, 裡頭啲飯散熱又夠快, 所以我一畀你, 就算你即刻食, 不過雞腿捲由雞皮包實雞髀肉, 雞皮愈燒, 脂肪就愈走, 雞肉嘅肉汁就鎖住晒, 所以真係好熱架」

(老實講, 雖然辣親條脷好痛, 但雞腿捲入味過雞翅包飯多多聲, 難怪一日可以賣到300條啦!!)

原來阿Jack是台灣出世, 8歲就來港讀書, 畢業後本來從事貿易的他, 因為公司結業, 於是便回台灣修讀大廚, 原本計劃於台灣開甜品店, 但因為妹妹在台灣大愛雞腿捲, 所以半年前便傾談在港開特許經營店.

我問老台灣, 如果去台灣夜市有何推介?? Jack :「鹽水雞, 藥燉排骨, 士林"十全"好出名, 不過E家好多人, 好難迫入去, 我反而鍾意去繞河夜市, 萬華夜市, 米血糕超正...宜蘭羅東夜市, 鴨喜露滷味水鴨骨仲好食...」

我決定下次去台灣前一定要找Jack列一個夜市覓食清單...(其實不如你全部引入嚟香港賣啦...點Jack??)

 

大仁生活facebook

http://dayanlife.blogspot.hk/2015/04/blog-post_16.html