牛油果雪糕、香蕉雞尾酒? 一試新奇又和諧嘅小食飲品!

灣仔萬麗海景酒店大堂翻新咗個角落做新餐廳 -- Mirage Bar & Restaurant，由早餐到lunch到high tea、happy hour同dinner都有，就係貪佢呢個角落嘅樓底有成25尺高，仲有得嘆維港全景，梗係夠哂舒服啦! 當日小編就係去試佢個happy hour menu嘅，包括有3款小食同3杯cocktail飲品，佢地嘅配搭都好新奇啊!

第一款小食就要由甜品開始講起，因為係用而家越來越紅嘅牛油果造雪糕! 本身已經好滑身嘅牛油果成為雪糕之後就更加creamy，加上杏脯乾同蜂蜜薄脆變成多種口感，非常值得一試!

之後曾經喺米芝蓮推介餐廳工作過嘅Chef Owen Panzica就參考咗古代西班牙人會採用 paprika 紅椒粉作為八爪魚保鮮材料嘅方法，用咗帶有少少紅椒粉香嘅薯仔泡沫演變成為「加利西亞風味八爪魚」呢道菜式 。

可持續發展海鮮推介就有煙三文魚配刁草酸忌廉，上菜時有煙燻蘋果木嘅一絲絲輕煙飄出，夠哂視覺同嗅覺效果。

而3杯雞尾酒就分別有: Lost in Translation主要用浸過煙肉嘅 bourbon 威士忌做酒底，加上檸檬汁同香料調味，成為摩登版嘅Whiskey Sour。

I’m Hallucinated就以冧酒為主，加上熱情果同五種以香料發酵過嘅蜂蜜去mix，就成為一杯受女士歡迎嘅雞尾酒喇。

No Monkey Business就係小編覺得最得意嘅，因為雞尾酒係用香蕉做主角嘅! 焦糖化咗嘅香蕉加埋伏特加就變成咗咖啡嘅味道，味道特別令人記得。

Mirage Bar & Restaurant
地址: 香港灣仔港灣道一號香港萬麗海景酒店一樓
電話: 2802 8888
營業時間: 星期一至日: 07:00-01:00

各位朋友如有任何新資訊，歡迎電郵至：[email protected]