不眠王子

小上海超強正宗上海住家菜

由不眠王子於 2012年03月26日發表人氣：1201

電郵給朋友

好耐無遇過一間令自己食得咁開心嘅小店，開心程度之大令我星期六食完，今日就要出篇 blog 講佢，仲要出埋王子印章。因為有水準嘅小店喺地產霸權嘅年代已經買少見少，有水準、價錢平兼有人情味嘅小店更係碩果僅存。

西營盤第一街有間 小上海 ，店子小小，只得幾張枱。老闆娘係上海人，跟老公、媽打齊齊打理呢間小店，一家人有禮、健談、好客到不得了，人情味濃到坊間少見，王子第一次幫襯，老闆娘好客到令我以為自己係西營盤嘅老街坊。店子生意唔錯，睇得出老闆娘最感激兩個人，一個係少年食神，另一個就係熟客林小姐，前者上年喺飲食雜誌介紹過，咁林小姐又係邊位？

佢就係經常喺王子個 Blog 出現嘅好友 Meling ，王子呢日中午跟佢及另一好友 Alison 嚟到食飯，全程聽老闆娘提起林小姐 3 個字不下 20 次，其中有接近 10 次更係對住其他枱食客介紹菜式時所提，老闆娘話每次有客要食油爆蝦 (必需一天前預訂)，佢就知道係睇咗林小姐介紹了，佢邊篇 Blog 咁有影響力？Click HERE 吧！

坐喺我對面嘅林小姐面都紅埋，我當然明白佢感受，因為自己亦試過，一間隱世小店經自己推介後，吸引到區外嘅食客幫襯，生意多咗，老闆自然會記住自己嘅名字，滿足感之大，會成為繼續寫 Blog 嘅最大推動力。

小上海 標榜上海人做的正宗上海住家菜，所以喺餐牌中會發現一般上海菜館都唔見有供應嘅菜式，腌篤鮮、地三鮮、紅燒划水、酒釀水泡蛋你食過未？部份美食更由老闆娘自己花心思改良過，單係一碟豆沙春卷已經令人拍爛手掌。

樣樣價錢平，卻無偷工減料，唔少仲係要花時間、工夫烹調嘅手功菜。客飯套餐只係 29 蚊，跟個靚湯之餘仲可以添飯無需額外收錢，出面食到咁平，都食唔到咁有水準囉！3 個人食咗 10 道菜，埋單只係 $270 ，抵到不得了。

涼拌海蜇 ($28) 份量唔少，冰涼得嚟唔會有陣雪味，青瓜絲、海蜇兩皆爽脆。

醉雞翼 ($24 / 4 隻) Meling 話醉雞翼比醉雞好食，一客 4 隻嫌份量太少？Don't worry！可以一隻一隻咁計，每隻 $6 ，但唔好咁衰叫一隻啦！醉雞翼用冰鮮貨，肉嫩滑、帶酒香，個人認為酒味濃一點會更好。

煎餛飩 ($24 / 8 粒) 即叫即煎，係店子招牌菜。大大隻、脹卜卜，賣相靚到極。

雲吞包得靚，煎得亦靚，隻隻用 slow cooking 慢火煎至金黃，咬落去嗰吓仲係脆嘅！內裡混入滿滿嘅白菜碎及新鮮豬肉，肉味鮮濃又多汁，好食到飽一飽都仲想 encore！

東坡肉 ($42) 係用新鮮五花肉，色艷汁濃、油香味重，完全展現到上海菜濃油赤醬嘅特色。據講老闆娘用 4 個鐘炆煮，再用 1 個鐘收汁，所以炆得入味。

東坡肉香腍鬆化，肉味鮮，滷得香甜，一嚿可送一碗飯。

鹹肉炒菜飯 ($29) 大大盆，正到要放張相上頂，喺 Facebook 忍唔住當日話咁大個仔喺上海館子食過最好食嘅上海菜飯，飯用珍珠米，飽滿圓潤好咬口，大量菜碎分佈均勻，少少鹹肉粒作吊味，煮熟後再落鑊唔加油就咁炒香，好食到我全餐飯讚完又讚。

上海粗炒麵 ($29) 色澤均勻，配料勁多，炒得夠鑊氣，又唔太油膩。

酸辣湯 ($36) 唔好以為 36 蚊得一碗仔，其實呢個係大湯碗嚟架！睇相都知係足料泡製，酸辣度亦比例適中，水準高到極。

燻魚 ($32 / 4 件) 位上咁有型？其實係老闆娘怕我哋食唔晒，於是只係俾 3 隻位上，每件計都係 8 蚊咋！

燻魚醃得入味，肉質出奇咁嫩滑，唔似得出面食開嘅咁乾身，表面微脆，味道甜甜哋香口到極！

酒釀水泡蛋 ($32) 係乜東東？酒釀丸子你就聽得多，酒釀水泡蛋你又食過未？望落好似好簡單，喺酒釀丸子中加隻溫泉蛋之嘛！老闆娘話其實唔易做，連佢老公都唔係次次做得好。食法係先食第一啖，感受吓酒釀丸子滲出微微酒香，然後將蛋黃跟酒釀丸子拌勻再食，酒釀丸子即時無咗酒味，甜甜哋充滿蛋香。