不眠王子

Sorriso 意大利紅蝦當造時

由不眠王子於 2012年03月02日發表人氣：889

電郵給朋友

王子喺海鮮之中，對蝦係特別鍾情，草蝦、白蝦、九節蝦、花竹蝦、虎蝦、天使蝦、牡丹蝦、海蝦、琵琶蝦、河蝦、龍蝦、基圍蝦、賴尿蝦 . . . 乜蝦都鍾意食，有啲蝦一年四季都輕易買到嚟食，但有啲就要睇時令。例如紅蝦，係身價最貴嘅蝦種之一，每年 10 月至第二年 3 月係紅蝦嘅產期，紅蝦屬於深海蝦，蝦膏勁多，產地主要有西班牙、法國及意大利等，當中以意大利嘅西西里一帶嘅質素最好，但亦都勁貴，一磅只得幾隻就要兩百幾三百蚊。

記得早排王子去過食 brunch 嘅意大利餐廳 Sorriso 嗎？今個月佢哋嘅晚市會用意大利西西里紅蝦做主打，而且仲採用隻隻接近 50g 、肥美膏多嘅珍寶級品種，推出多款以意大利紅蝦入饌嘅菜式，王子再獲邀請率先試菜，我一聽到有西西里野生紅蝦，即刻將手頭上嘅工作放低，飛車去尖沙咀。

Sorriso 平日嘅午餐都係百幾蚊，可能你會話「唓！呢個價錢尖沙咀好多高級餐廳都差唔多之嘛！但呢度嘅午餐係半自助形式，頭盤、沙律及甜品係任食喎！你望望下面堆相先啦！

頭盤我影唔晒，放幾張引吓你先，例如巴馬火腿任食啦！

海鮮沙律有蝦、有蜆、有青口，有天然陽光照住，影出嚟特別靚。

Cold cut 都有好幾款，砌得靚靚。

水牛芝士都有

奄列相當唔錯

今次試咗幾款意大利西西里紅蝦菜式，印象難忘，啖啖蝦肉爽滑鮮甜到不得了，蝦膏又多味又濃，果然係極品。但每道都係晚市單點嘅，午餐無架！

薄切意大利紅蝦 ($198) 賣相靚到極之餘亦盡顯廚師刀功，記得連紅蝦頭都唔好放過呀！好多濃濃嘅蝦膏架！

廚師將意大利紅蝦起肉，只加少少配料及橄欖油輕輕調味，蝦肉超鮮甜。

意大利紅蝦海鮮湯 ($158) 因為紅蝦肉夠多、膏油夠濃，加埋其他海鮮一齊熬湯自然夠稠身，口感有啲似龍蝦湯，但味道較鮮甜。

最正係有整隻紅蝦及帶子、青口等浸住喺湯內，入晒味。

意大利紅蝦雲吞配龍蝦汁 ($228) 猶如盛放嘅玫瑰 . . . 仲要係勁大朵。