不眠王子

君悅酒店 Tiffin 半自助 High Tea

由不眠王子於 2012年02月07日發表人氣：1639

電郵給朋友

好多人以為，High Tea 係闊太嘅專利，但我每一次跟朋友去酒店嘆下午茶，見得最多嘅除咗闊太，亦有唔少情侶及生意人，情侶下午唔需要返工咩？呢個世界既有輪班制，亦有人會放閒日，甚至好似我呢一類，偶然蛇王去輕鬆吓！

君悅酒店閣樓嘅 Tiffin 茶園 係一個 high tea 嘅好地方，地方大、樓底高、侍應足、招呼好，而且價錢亦算合理，閒日每位 $218 ，兩位 $436 ，比呢個價錢更經濟嘅 tea set 係有唔少，但質素呢？如果 high tea 過程中食一個只得 cup cake 、果撻、芝士三文治嘅普通 tea set ，High tea 仲有乜意義？唔好忘記你要對住佢兩個幾小時喎！

Tiffin 上年 10 月起，Afternoon Tea 大變 "新" ，變成下午茶半自助餐，除咗 tea set 必備嘅 5 層餅架，仲有個規模相當大嘅任食雪糕甜品吧，食 tea set 都可以食到回本，你試過未？加上爵士樂三重奏現場演奏舒服到不得了嘅旋律，High 呢個 tea 真係有百幾層樓咁 high。

Afternoon Tea Set 雖然有單人 set ，但二人 set 嘅陣容會豐富一點，計落仲抵。唔要個 tea set ，純係幫襯任食雪糕甜品吧？得！每位 $180 ，但唔包餐茶。小學生都識計，$218 包括 tea set 、雪糕甜品吧及餐茶，抵好多囉！所以老友 Meling 早兩日約我嚟 high tea ，開心死我。

High Tea 架除咗有型，仲相當方便，每層都可以獨立放上枱面，五層餅架有鬆餅、三文治、macaroon、煙三文魚酥皮撻、葡撻、芒果蛋糕等 15 款鹹甜美食。

鬆餅固然外鬆脆、內鬆軟，牛油味也香濃。不過呢 . . .

味道天然香甜的果醬更吸引我。

Parma ham 伴原隻無花果至係絕配，比一般酒店用蜜瓜當然豪氣得多。

煙三文魚酥皮卷嘅主角唔係煙三文魚，而係厚厚的酥脆酥皮卷。

同樣，鵝肝伴蒜蓉包及葡撻，主角係鵝肝醬。

葡撻要熱氣騰騰才好食，所以呢件 . . . 就 . . .

面層加上車厘子汁嘅鵝肝醬好味到難以形容，濃濃嘅鵝肝醬滲出天然果香，原來可以正到咁。

桑梅林明頓蛋糕味道唔錯，Macaroon 就麻麻哋，唔夠脆口。

士多啤梨撻一望都知有幾好食。

芒果蛋糕水準相當高，啖啖芒果肉夠香甜之餘，忌廉亦芳香軟滑。

朱古力蛋糕朱味香濃而唔會太甜，Good 呀！

朱古力慕絲脆筒最正自然係香軟嘅朱古力慕絲啦！