不眠王子

皇鳳星光熠熠港式燒烤店

由不眠王子於 2011年10月17日發表人氣：850

電郵給朋友

年中喺可口可樂上海之旅中認識咗有線娛樂新聞台嘅靚女主播史澤雅 Sonia ，上個月底收到靚女留言，話佢老友喺星街開咗間港式燒烤店，想約王子去食吓嘢，俾吓意見。我嘅回應令靚女喜出望外 :「我知，排舞師 Sunny 開的嘛！我有睇妳嘅報導架！」

星街開港式燒烤店？喺王子印象中，星街一帶有唔少個性食店，例如百幾蚊一碗難食到死嘅麵，只有錢多到亂 fing 嘅天王至會幫襯嘅食店，亦有收費充高級嘅港式日本料理。但我相信明星效應會令唔少食客慕名而來，單係店名都夠吸引。

皇鳳？有乜咁特別呢？我話俾 Sonia 知，商台 DJ 少爺占以前有個節目，其中一個講故仔嘅環節，主角就係叫做王鳳，由少爺占反串聲演，有唔少人識架！

即時約埋老友 Meling 及愛麗絲結伴同行，3 個靚女相伴王子，口福不淺加艷福不淺仲要加埋唔駛俾錢 . . . 人生若此，夫復何求！

對唔少女食友嚟講，店中嘅勁靚仔經理 Dennis 相信係另一生招牌，佢其實係組合 Sun Boy'z 嘅前成員麥子豪，靚仔仲要人品好，睇住佢當晚喺店中滿場飛，對枱枱客都 nice 到極，相信好快會有大班熟客。

皇鳳 雖然係間港式燒烤店，但格局比坊間大部份同類嘅店骨子好多，坐得亦亦舒服，怕熱鬧嘅可以坐最入嘅內廳，燈光暗一點情調唔錯。

至於 service 就 . . . 係同類店中最好嘅一間，幾個店員都相當有禮貌兼好招呼。

雞公碗、百年好合筷子，貫徹港式風味，店新開，衛生程度當然好。

燒烤店唔只有清酒、啤酒供應，就連紅酒、以至香檳之王 Don Perignon 都一樣有得飲，罕見吧！價錢，當然比酒店合理。

店子除咗燒烤，仲有鐵板燒，兩位師傅均嚟自人氣食店，水準唔需要懷疑。

合鴨煮 ($45) 賣相似煙鴨胸，但口感及味道卻完全係兩回事，肉質嫩滑，口感軟腍，丁點韌都無。伴少少京蔥及法式芥末醬，惹味到不得了。

煙肉車厘茄 ($22) 有乜特別？無！好多燒烤店都會做，嚟呢啲地方嘅指定動作。

唯一嘅難度係燒得有無心機，煙肉色澤均勻外微脆，車厘茄唔會烤到水份流失皺晒皮，咬落去仲係 juicy 到爆汁嘅就唯之最 good ，呢度做得到亦做得好。

潮汕牛肉餅 ($38 / 左) 及 皇鳳春卷 ($28 / 右) 前者有驚喜，外表似普通牛肉，但口感卻爽彈如牛丸，過癮！後者賣相唔似春卷，味道有啲似雞肉，其實係魚肉來的。

出面食串燒，通常都有醬汁提味。呢度嘅兩款醬汁都係自家製，味道唔錯。

法式鵝肝多士 ($68) 絕對令人又愛又恨，香噴噴到呼吸都加重咗！索呀！

鵝肝外微脆、內軟滑，燒得恰到好處，死就死啦！

荷蘭大啡菇 ($28) 絕對係開心大發現，正正係店中有鐵板燒誘人之處，大啡菇質感爽滑超彈牙，仲 juicy 到極，廚師調味水準一流。小心 . . . 一件肯定唔夠喉！

黑松露鐵板牛油炒什菌 ($62) 姑味勁香濃，仲有酒香添！食到大家停唔到口。

燒茄子 ($18) 跟好多燒烤店一樣，都係加堆香蔥原條去燒，不過，有幾多間用靚茄子之餘又燒得好呢？我喺尖沙咀某間燒烤店食過幾次，都係苦到要即吐的。

呢度嘅燒茄子當然唔苦，仲鮮味又多汁添！

蔥花扇貝 (時價) 係用新鮮貨，店方喺朝早到街市海鮮檔入貨，絕對鮮味十足，大家落單時不妨先問價錢。

煙肉大葉海蝦 ($36) 用大塊煙肉捲住海蝦去燒，熱力迫到豬油平均滲到彈牙嘅蝦肉上，好有罪惡感，但真係好 ~ 好 ~ 味 ~ 呀！

明太子大虎蝦 (時價) 係全晚唯一令我好唔知醜咁要求 encore ，出面唔係食唔到，而係做到咁出色嘅 . . . 一時三刻諗唔到有邊間。

明太子佈滿 10 吋長嘅大虎蝦上，再用沙律經封住嚟 BBQ ，香噴噴得攞命，大虎蝦唔係用雪藏貨，肉質當然鮮味彈牙啦！

皇鳳雞燉翅 ($168) 係皇鳳嘅鎮店之寶，每盅燉足 8 粒鐘，想食最好兩日前預訂。

雞燉翅用足真材實料熬製，一梳梳原隻金勾翅、金華火腿、瑤柱、雞肉等裝得滿滿，燉足 8 粒鐘，湯底必然清甜滋潤。雖然自己已有幾年無食翅，都忍唔住試咗半碗。

懷舊肉鬆豬油撈飯 ($25) 跟出面一般嘅豬油撈飯有啲唔同，呢度先用豬油混合醬油煮成醬汁，然後才加落熱烘烘嘅飯粒中，最後放上肉鬆及香蔥，口感如食台式肉燥飯，但罪惡感就細咗好多，感覺無咁油膩。

鯛魚湯滔庭烏冬 ($48) 用新鮮鯛魚，配上鮮菇、黃牙白去熬湯。當晚無鯛魚，廚師就改用  魚，湯頭一樣咁鮮甜，零味精，烏冬滑溜好咬口。

蜜味雞翼 ($28) 係食燒烤嘅必然之選，一客 4 隻，選用 size 唔細嘅雞中翼。

雞翼燒得靚唔靚？有相你睇，唔係度度做到咁嘅水準，雞肉仲好嫩滑添！

燒芝士年糕 ($28) 又係一樣唔易做得好嘅美食，做到熱氣騰騰外微脆唔難，但要裡面嘅芝士剛溶，展現流心嘅效果，就好睇時間上嘅掌握。

皇鳳用上 mozzarella 芝士，芝味香濃，好食係一定嘅，只係流心程度稍嫌不足。

椰子雪葩 not my cup of tea ，一來只愛質感軟綿綿嘅雪葩，二來我麻麻哋椰子陣味。