不眠王子

吉士酒家本幫菜濃油赤醬老上海

由不眠王子於 2011年05月21日發表人氣：582

電郵給朋友

又到王子周末推介啦！今次上海之旅超開心，一來有好友 Meling 結伴同行，二來可以真真正正喺上海品嚐到當地人推介嘅必去食店，試咗唔少美食。短短 3 日我哋已經食咗 10 餐 (唔計飛機餐)，真係數完自己都嚇一跳。好彩最後一日嘅當中 3 餐，有可樂嘅代表 W 小姐加入，多一個人可以試到更加多好嘢，正！

上海地膽或當地食評網都對 吉士酒家 有高度嘅評價，唔少人都話吉士係到上海必食嘅首選，乃上海本幫菜嘅代表云云。雖然佢有好幾間分店，但個個都推介徐匯區天平路有舊吉士之稱嘅元祖店，咁梗係照信無疑啦！

閒日中午嘅天平路相當靜，吉士亦未見人龍出現，因為未到午飯時間嘛！但入到去卻見到有 9 成滿，雖然吉士樓高兩層，但其實只係小店一間，餐枱就只有 10 張鬆啲！多得 Meling 嘅上海朋友早一晚幫我哋預先訂咗枱，所以一去到就有位了。而坐低無幾耐就見到食客絡繹不絕，當中有唔少打扮到似喺中環返工嘅 OL 嚟幫襯，應該到咗午飯時間吧！好彩早到咋！

餐具無乜特別花巧，跟一般酒家差唔多，望落仲有少少殘舊嘅感覺添！

兩女一男食 lunch 點咗 8 道菜 . . . 都幾瘋狂吓！無計啦！太多名菜、招牌菜都好想試嘛！最後有一兩道菜有少少剩咗食唔晒，大家已經盡咗力啦！

吉士鹹雞 (￥38) 對當地人嚟講可能無乜特別，但對於難得食到新鮮雞嘅香港人嚟講絕對係如獲至寶。

鹹雞其實只係微鹹，雞皮滑溜爽脆脂肪少，雞肉鮮味嫩滑雞味濃，叫我日日食都唔會厭呀！

老醋蜇頭 (￥38) 非吃不可，當日食到 W 小姐超興奮。

海蜇頭喺香港唔算太難食到，但滑溜爽脆又惹味嘅就真係無乜幾可遇到啦！脆到呢 . . . 好似食緊軟骨咁。

馬蘭頭卷 (￥22) 係功夫繁複又賣唔起錢嘅清涼頭盤，呢度做得好好味。馬蘭頭翠綠鮮嫩，切得幼細到極，鮮百頁捲得相當紥實，口感外軟內爽口，帶點點麻油香，又美麗又涼快。

活剝河蝦仁 (￥98) 係呢餐最貴嘅一道菜，亦係全場每一枱都會點嘅名物。香港食到嘅清炒河蝦仁既無咁靚仔嘅賣相、亦無咁重量級嘅份量，更莫講甚麼蝦鮮味了。

河蝦附上赤色鳳尾，明豔照人，口感當然爽夾彈，好鮮味又唔油膩。數量勁多，食極都有，超滿足。

虎皮臭豆腐 (￥18) 其實都唔係太臭，仲好惹味添！

外層嘅薄薄腐皮炸到金黃酥脆，香在外、臭在內。

臭豆腐熱辣辣、好軟滑，咁平嘅名菜，點可以唔試？