不眠王子

鴻禧茶居華麗明星菜沙頭角村長個女李愛

由不眠王子於 2011年05月17日發表人氣：614

電郵給朋友

王子跟好友 Meling 應可口可樂之邀，跟一班本地傳媒到上海參加 125 周年嘅連串慶祝活動，到埗第一餐晚飯，由可樂做東，到頗具名氣嘅 鴻禧茶居 食晚飯。

樓高兩層，面積達 7000 多呎嘅店子由趙世光太太何琍琍於 02 年投資超過 2000 萬，將 18 世紀嘅石庫門房子改造成正宗嘅淮揚菜飯店。講氣派，可以話靚到得人驚。

飯店樓下那層金碧輝煌，只得幾張枱，空間感十足。

天井位有個唔細嘅池塘，養咗唔少錦鯉。

二樓地方更大，樓底相當高，既有情侶卡座、普通 4 人枱、6 人梳化位及 2 間 VIP 房。

全場嘅杯杯碗碗碟碟，都係由老闆娘親自設計架！

一行十幾人分咗兩張大枱各自點菜，我呢枱有 Meling 、可樂嘅靚女公關、有線嘅靚女主播 Sonia 及攝影師哥哥，最開心係原來大家都係為食之人，大把話題講。

飯店格局無錯係富麗堂皇，但菜式無想像中咁好食。

極品蒙頂甘露 (￥40 / 右) 及 碧潭飄雪 (￥30 / 左) 係專登各點一杯試試，據聞用嚟沖茶嘅水係用莫干山泉水，飯店隔日由浙江運到上海，聽到我 O 晒咀。呷一啖 . . . 嗯！水質唔夠清亦唔夠滑，茶香淡如無物 . . . 就當我唔識貨吧！

口水雞 (￥38) 係冷盤，一小碟上。雞肉超嫩滑、雞味鮮濃，醬汁香而不太辣，好惹味。係唯一在座一致讚好嘅菜式，水準更勝之後出場嘅幾道主菜，無奈到爆。

揚州大煮干絲 (￥98) 係淮揚名菜之一，睇得出廚師刀功甚了得。可惜湯汁偏濃、味道一般，蝦仁鮮味欠奉。

鴻禧一品獅子頭 (￥258) 最令大家失望，貴到死兼用店名排頭，以為點招牌菜一定唔會死錯人。但各人興高彩烈咁試咗第一口後就停晒手，係咁意食吓黃芽白就算。

獅子頭肉味係夠晒鮮，但質感過於軟腍，口感太鬆散，有一種好唔實在嘅感覺，大家食完第一啖都擰晒頭，莫講話 268 蚊人仔，100 蚊都唔值。

樟茶鴨 (￥128) 見國內食評網口碑唔錯，即管試吓！

店方用一斤重嘅小麻鴨去烹調，跟夾餅一齊食，上到枱見樟茶鴨色澤均勻，賣相唔錯，應該好食吧？

夾包夠鬆軟，本身都好好食，配合埋鴨肉當然更正。

樟茶鴨炸得夠脆、燻得夠香，鴨皮酥脆脂肪少，肉質鮮嫩夠惹味，就咁食已經好正，係全晚唯一一道主菜俾大家掃清九成。

鴻禧鱔糊 (￥98) 由最愛鱔糊嘅 Sonia 率先起筷，望到佢無晒癮個樣都知發生乜嘢事，我本身對鱔興趣不大，但見到賣相唔錯兼想知道難食嘅原因，於是一口兩條試試 . . . 唉！鱔肉唔爽口、無晒彈性，軟腍腍嘅口感完全唔似食緊鱔，味道亦過濃，如果玩 blind tasting ，你未必估到食緊乜。

清炒酒香豆苗 (￥58) 味道唔錯，豆苗夠爽嫩。

唔記得呢碗糖水個名叫乜乜丸子，亦唔記得要幾多錢，只記得味道太過甜，呷咗一啖就已經頂唔順 . . . 唉！

電話 : 021 - 6385 7777 平均消費 : ￥200 - ￥250 / 位

地址 : 上海 盧灣區興業路 123 弄新天地南里 3 號樓

一按地址直達 Google 地圖

分享到 facebook

上一篇：老船長酒吧自家鮮釀德國啤酒

下一篇： Groupon團購網規模夠大至穩陣