不眠王子

季季紅風味酒樓唯獨是乳豬不可取替

由不眠王子於 2011年05月05日發表人氣：1057

電郵給朋友

香港有好多食乳豬嘅好地方，尖沙咀嘅天寶閣、君怡閣、深水埗嘅賣豬仔等，還有位於屯門，今年剛獲米芝蓮推介嘅 季季紅風味酒樓 ，好友相約季季紅 12 人飯局，我一口應承，最初以為係去總壇屯門南地店，最後當然係我一廂情願嘅想法，屯門對一班朋友嚟講又真係遠咗啲嘅！最方便大家嘅就只有荃灣店，王子一向唔會事前睇食評網，怕影響自己，但為咗搵地址，於是上網睇吓！咁多喊面嘅？嗱！真係影響到架！

但我要幫季季紅荃灣店講句公道說話，服務水準無網上講到咁差，而且俾喊面話店員服務差嘅大部份都係新戶口，相片都唔多張。大家有時要用個腦諗吓！會唔會有人俾酒樓炒咗，於是存心不良呢？

呢晚由傳菜嘅阿姐到侍應至女部長，個個都咁好招呼，部份仲幾講得笑添！

至於菜式，除咗招牌菜 蝦禾米乳香豬 叫做見得吓人，其餘都麻麻哋！部份仲唔合格到全枱人齊表失望。

澳洲焗原隻生蠔 ($75 / 半打) 店家有砵酒焗及剁辣椒焗兩種焗法，我哋每種點咗半打，我興趣不大，無試到。但蠔身都幾大隻肥美，但睇上面碟砵酒焗蠔，應該焗到過咗龍，蠔身水份流失 (唔食都咁多嘢講，真多咀！)。

剁辣椒焗蠔亦似乎焗到隻蠔縮咗水，但應該好味嘅！

冰淋醬烤骨 ($62) 據稱又係店家招牌菜，坦白講，呢碟鑊氣唔夠，軟骨部份偏韌，味道只係不過不失。大把屋邨大排檔或熟食亭好食過佢，仲無咁貴添！

多此一爪大勝雞 ($138) 據稱又係店家招牌菜，好友 Meling 食評話多此一碟，我舉腳認同，店方話用新鮮走地大勝雞，無錯肉質係好嫩滑，但全枱人一致認同隻雞唔新鮮，12 個人分隻雞都食剩唔少，你話幾唔掂。

脆皮炸大腸 ($48) 只係微脆，食落唔爽口兼有啲韌！

大桂皇兩味 ($148) 可以引用廣告中間括號嗰句，但要飛走個 "益" 字，即係 "即晚生劏食家"。望住阿叔手抱嗰條，再望吓枱上嘅兩細碟小菜，感覺有搵笨之嫌。

西蘭花炒桂皇球 話係用桂花魚嘅魚柳部份，但炒得唔夠火候，桂花魚肉質應有嘅滑溜口感亦欠奉。

蒜子火腩炆桂皇頭腩 食咗一件、唉咗一聲，講完。

芝士焗龍蝦伴伊麵 ($198) 殼多肉少，唔知點解有一件仲係空殼。咁嘅價錢，去鯉魚門食包你痛快得多。