不眠王子

Jeremy Scott x Swatch 錶 ● 演藝術

由不眠王子於 2011年04月03日發表人氣：475

電郵給朋友

90 年代，王子係 Swatch 的超級粉絲，仲要係專買會員系列 Club Special 及特別限量版手表，Jelly Fish 、Jelly bubbles 、Golden Jelly 、Encantador 、Chandeller 、Vivienne Westwood 的 ORB 都擁有過，最瘋狂時家中有過百隻特別版的 Swatch ，而家仲 keep 住的，得番唔夠 20 隻啦！

人老咗，近 10 年好少有買 Swatch 的衝動，可能無乜邊款個 design 真係吸引到我吧！

直到最近遇上 Jeremy Scott x Swatch 呢個 1 set 3 款的型爆系列，第一次見到已經一見鍾情，可惜上個月第一批貨一出就極速俾人掃晒，拍賣網更曾經炒貴咗成倍 (最近跌番晒價，炒唔起啦！)。

Jeremy Scott x Swatch 第二批貨喺兩個星期前靜雞雞到咗門市，好友第一時間通知，仲喺到貨日一早飛去門市幫我買。

鬼才設計師 Jeremy Scott 為 Swatch 設計的 3 款手表分別有閃電 Lighting Flash 、翅膀 Winged 及畫框 Opulence ，英文名字係官方命名的，唔係我作架！每款賣 $500 ，超值！

翅膀版的表盒跟其他 2 款所用的一般長形表盒唔同。

畫框呢款最初睇相以為只係啱女仔帶，但見到實物 size 都唔細，而且經我加咗小小鬼主意後，Man 咗好多。

點解 3 款手表中王子唯獨唔買閃電嗰隻？一來閃電唔似得其餘兩款咁有個外框，有相你睇 (圖片喺 google 搵的)，帶咗之後顯得平平無奇。二來見過朋友將閃電表帶扣咗上手後，覺得唔係咁好睇囉！

王子買翅膀同畫框，估唔估到有乜小小鬼主意呢？

答案正正喺手表的兩款外框上。

全白表身加上白色翅膀，就好似天使之翼一樣。

但將天使白翼套上黑色表身後，當堂高貴咗，對翼亦顯得更突出，有種天使魔鬼混合體的感覺。

黑表白翼襯黑衫，型好多囉！