不眠王子

圓華薈廚他與她的約會勝地

由不眠王子於 2010年10月31日發表人氣：1601

電郵給朋友

又到王子周末推介啦！今年嘅生日飯食完都差唔多有 3 個月，現在才 post 無非想配合呢個星期嘅主題 :【隱世】

圓華薈廚 隱世到點？餐廳面積大到可以擺結婚酒，但晚市卻只得三數枱客人 . . . 地點係個致命傷，位處荃灣與汀九之間，唔係專程去嘅話，你根本唔會發現佢 (即使喺出面經過)，除非你係汀蘭居嘅居民吧汀蘭居係服務式住宅，要去 圓華薈廚 ，就必須先要入去汀蘭居，經過大廈嘅大堂，直走再轉個彎才見。交通亦唔太方便，最直接嘅方法，係由荃灣地鐵站 B3 出口，搭汀蘭居嘅穿梭巴士吧！

一進入餐廳，首先係酒吧區，感覺裝修都幾落本吓！

餐廳另一邊係 180 度無敵海景落地大玻璃，少見吧？

再行入一點，就是給二人世界的最佳位置。

用 DC 玩移軸鏡效果，自己已到咗得心應手嘅境界。

點菜前，懶浪漫咁點咗杯 Special Cocktail ($45) 賀生晨。

是夜點咗一個 set dinner ，再散叫其他菜式試試。餐包熱烘烘、夠軟熟，加分！

龍蝦湯 ($58) 係散點嘅！以份量計價錢唔算貴，夠熱亦夠杰，濃濃嘅海鮮味帶少少 creamy ，唔太鹹，So good！

香煎鵝肝配南瓜意大利飯 ($148) 老土啲都要講一句，絕對係色、香、味俱全。雖然餐廳呢晚只得幾枱客，但感受到廚師依然落足心機，交足功課。

鵝肝大大件，外層煎到微脆甘香，入口滑溜軟綿綿，味道超濃。意大利飯做法正宗，飯粒軟糯有黏勁，南瓜汁又香又 juicy。配合鵝肝一齊食，冧到暈，甜到入心。

Set dinner 包括頭盤或餐湯、主菜、甜品及餐茶，價錢由百幾到二百幾不等。咁浪漫嘅環境，招呼又咁好，美食又有質素，收貨有餘吧？

點咗 清蒸比目魚拼香煎海虎蝦配香草天使麵 ($238) 嘅晚餐，頭盤揀 芒果蝦沙律 ，份量唔少，味道清新。

清蒸比目魚拼香煎海虎蝦配香草天使麵 伴香蒜忌廉汁，比目魚同海虎蝦嘅 size 大到 . . . 食完唔飽至奇。