不眠王子

逸泰居 Catalina's 隱世靚景意國風情

由不眠王子於 2010年09月15日發表人氣：4731

電郵給朋友

自從同靚女 Blog 友仔 Lisa T. 熟絡咗之後，呢位喺國泰工作嘅空姐話俾王子知，國泰城內有間隱世絕密無敵靚景嘅酒店高級餐廳，網上無食評，Openrice 直情無紀錄，餐廳亦唔對外開放，問我有無興趣試 . . .

嘩！美食、美景加美女，咁都無興趣仲係地球人咩？我只係喺度諗，乜國泰城內有酒店嘅咩？

Headland hotel 逸泰居 喺國泰城內，聽講平日只招待國泰員工，而位於酒店頂樓嘅西餐廳 Catalina's ，自然亦不作對外開放，但王子有 Lisa 帶住嘛！但如果你想入去 . . .

1. 搵個喺國泰航空工作嘅朋友仔帶你入去。

2. 就咁行入去，駁餐廳唔 check 你身份，真係 check 嘅就攞出誠意，對佢哋話特登喺老遠嚟捧場架！我哋今次入去，佢哋都無 check 到身份。

3. 留意不眠王宮嘅 Facebook。

不過，呢度只開星期一至五，同埋只做午市，有心幫襯都幾高難度。但有啲特別節日，好似情人節、聖誕節及新曆新年都會做埋夜場，想知詳情可以到時問我嘅！

入到 Catalina's ，被窗外優美嘅景色吸引到企定定望咗好耐，藍天白雲，停機坪就喺無幾遠，我影呀影呀影 . . . 連 Lisa T. 已經走到遠遠坐低咗都唔知，真失禮。餐廳枱數唔多，頂盡坐到 70 人左右，但地方相當寬敞，樓底又高，空間感一流，餐具亦夠雅緻，而 service 亦達到 5 星級酒店嘅級數，絕對係拍拖食飯嘅最佳選擇之一。

Catalina's 個名其實有段古，佢係一架喺 1946 年投入服務嘅水陸兩用機，由國泰創辦人 Roy Farrell 親自命名，專門運送黃金往來香港及澳門。

呢日嘅天氣真一流，白   嘅雲層厚一厚。

坐底之後發現呢邊嘅景色仲靚，對住個無敵海景。

忍唔住玩吓部機嘅內置功能，影咗好多張好有模型 feel 嘅移軸鏡效果，係咪好得意呢？

啲車開得咁快，部機仔都影得咁清楚，好開心呀！

雖然不斷有飛機喺附近起飛，但餐廳隔音設備一流。

餐廳午市除咗可以散叫，亦可以試吓名為 "Mix & Match" 嘅兩道菜午餐，因為價錢明顯經濟得多，只係 $190。湯類 2 選 1 ，主菜可以 3 選 1。可惜唔包餐茶，不過以酒店嚟講，價錢都尚算合理，而且免收加一添！

套餐如果加多 $50 ，可以享用價值 $80 嘅甜品，仲有 3 款選擇俾你揀。我哋揀咗 2 set 套餐連甜品 share 食，突然間有種老友鬼鬼嘅感覺 . . . 埋單齊頭 $480 ，應該係近期最貴嘅一餐 lunch ，但我一啲肉赤感覺都無，食得超開心嘛！

一籃子麵包先到，包身好軟熟，但最搶鏡嘅反而係一片厚厚圓圓嘅香滑牛油，Lisa T. 唔食牛油，侍應生快速咁為佢換上橄欖油及黑醋汁，好體貼噃！

普羅旺斯雜菜湯 味道介乎於羅宋湯與雜菜湯之間，味道無前者咁濃，但配料嘅種類及份量都勁多，都幾好飲 . . . But 如果用細火煲多兩粒鐘，杰身啲！效果會更好。

茴香薯仔湯 質感夠濃稠，薯味濃，煲得亦夠火候。

燒銀鱈魚 由 Lisa T. 做主力，我試咗少少，水準一流。