不眠王子

麵創坊 - 已結業

由不眠王子於 2010年09月02日發表人氣：439

電郵給朋友

本來上星期已訂好講吓隱世食店，無諗到講完第一間就發生大事而停咗幾日 Blog ，今日繼續 . . . 雖然開業接近一年，但一跟朋友講起 麵創坊 ，莫講話我呢類九龍仔，就連住太古城啲 friend 都唔知呢間食店喺邊度，所以話佢隱世都唔算太過。如果搭港鐵，最近係由太古站 A2 出口行過斜對面 (向鰂魚涌方向) 就係基利路，入到去就唔難搵。

店如其名，主打各式創新粉麵，餐牌簡潔，款式唔算多，但勝在唔少都頗有特色，更列明味精無添加，夠吸引力。店子格局亦雅緻、地方寬敞，坐得尚算舒服。

花雕醉酒雞翼 ($25) 用大大隻中翼浸製，賣相吸引。

雞肉非常嫩滑，但個人覺得酒香欠奉，有少少失色。

香酥炸豬大腸 ($38) 可以列為店內招牌菜，炸豬大腸係平價菜式，但工序煩複，花時間又長，又唔係讚得多錢。所以好多地方都有得食，但無乜邊間做得好。呢度嘅炸豬大腸可以用激節讚賞嚟形容，食一粒已令人眼前一亮。

豬大腸清理得乾乾淨淨，腸皮炸到香脆可口，大腸爽滑之餘易消化，一啲都唔韌，有驚喜。

本地新鮮坑腩拼魚片頭配森寶醬撈粗麵 ($68) 係店內另一皇牌。網上有朋友話價錢超貴，又係食米唔知價，你哋喺出面食碗坑腩麵有無咁多坑腩？去九記或垃圾嘅大利食一碗淨坑腩要幾多錢？份量有無咁大碗？

馬來西亞森寶醬味帶微辣，撈粗麵惹味到極。

新鮮坑腩大大碗份量十足，質感爽滑有肉味，超正！

蝦湯蝦球鴛鴦 ($58) 點解會溝鴛鴦？其實鴛鴦即係米粉拼河粉，口感都幾得意。蝦湯香濃到不得了，但一如店方強調味精唔落，飲晒碗湯都唔會覺得渴喉。

蝦球都幾大隻，肉質通透、爽口彈牙，唔係用雪藏貨

黃綠相配檸茶 ($20) 即係普通檸檬拼青檸檬茶，又幾好飲喎！茶味亦夠香濃。

紅豆冰 唔記得幾多錢，只記得好正，有相你睇，冰刨得綿密到好似沙冰一樣，攪到起晒沙後，超好飲。