不眠王子

Japanmama 店如其名認真麻麻

由不眠王子於 2010年06月29日發表人氣：528

電郵給朋友

講過 N 咁多次九龍城無一間水準似樣嘅日本料理，呢間啱啱新開無耐嘅 Japanmama 又如何呢？地方細細環境都幾舒服，招呼亦唔錯，但師傅刀功及部份食材水準扣咗唔少分，本來試餐牌上的推介及掛喺牆身木牌上嘅是日新鮮到港精選應該比較穩陣啲，於是點咗 7 款嘢，由最平 $18 嘅厚燒玉子到最貴嘅 $180 飛魚刺身，結果 . . .

呢餐係答謝 Blog 友 Queenie 嘅愛心醋，跟老友嘉嘉齊齊做東，因呢間料理閒日晚市唔係太爆，可以傾餐飽。

三文魚刺身 ($18) 其實只得薄薄 2 小片，呢碟已經係 2 客嘅份量，即係要 $36 ，貴得嚟唔值！質素麻麻，唔夠新鮮，似雪咗一段時間，日式超市買盒築地出品都無咁貴。

海鮮春卷 ($23) 外層唔夠香脆，反而捲住嘅疑似係長腳蟹肉，唔係超市嗰啲魚肉扮蟹柳，食落都幾鮮味。

飛魚刺身 ($180) 係睇牆身嘅木牌仔落 order ，比外間同類料理貴 10-15% ，Fine！如果夠鮮味又好食嘅又有乜所謂！但一睇賣相已經覺得唔合格 . . . . 直情唔開胃！

師傅嘅刀功個人覺得係慘不忍睹，好多片都切到蓉蓉爛爛，唔係啩？自己睇相囉！

其中幾片更帶有明顯血跡，MK 啲師傅都唔會咁呱？

北海道魚生卷 ($33) 所採用嘅只不過係三文魚及鱆紅魚，呢個價錢有咁嘅份量算抵食嘅！而且味道亦唔錯。

魚生頗鮮味，飯粒飽滿有黏勁，有一種清新嘅感覺。

汁煮牛脷 ($28) 炆得軟腍夠入味，令我哋一致讚賞。

厚燒玉子 ($18) 拉低晒全晚嘅分數，落單唔夠一分鐘就上枱，快到我哋 3 個 O 晒咀。輕咬一啖，蛋味欠奉、只有雪味，質感亦偏硬，雪得太耐之故，差啲想叫唔該回水。

燒三文魚薄餅 ($73) 感覺貴咗少少，落單時侍應話是夜飛機貨未到，未能供應。究竟係三文魚未到？定係薄餅未到呢？我估係前者吧！食到尾聲，侍應又話飛機貨剛到 . . . Well！一於試埋啦！好彩，都幾好食。

三文魚薄餅其實唔係只得三文魚，仲有吞拿魚同  魚，再放蟹籽及沙律菜喺燒薄餅上面，和風味濃。