不眠王子

Chili's Too 關島嘆超強心太軟

由不眠王子於 2010年06月26日發表人氣：695

電郵給朋友

喺關島最大嘅購物中心 Micronesia Mall 內 shopping ，又點只去 Cold Stone Creamery 食雪糕咁少，其實之前已去咗對面嘅西餐廳 Chili's Too 撐枱腳。Chili's Too 係 Chili's 喺關島嘅分店，Chili's 對香港人嚟講或會有少少陌生，但呢間喺全世界 27 個國家超過 1600 間分店嘅西餐廳原來已超過 30 年歷史，點想像到以前嘅佢只係一間位於美國德州嘅小小漢堡包店。

Chili's 總店地點偏遠，所以揀咗呢問分店試吓！點解幫襯佢？我哋為咗最頂張相中嘅人氣美食囉！

Chili's Too 格局似傳統嘅美式休閒餐廳，我 . . . 都係鍾意坐卡位多啲！夠闊落之餘張枱都大啲！

餐廳內亦有張小吧枱，好杯中物嘅坐呢度 fit 晒！

Menu 內嘅選擇唔太多，都係大路嘅 pizza 、burger 、鋸吓扒咁，價錢亦唔算太貴，同香港同類嘅乜乜 Tuesday 、物物 Friday 西餐廳差唔多啦！

Strawberry Lemonade (US$3.29) size 有啤酒杯咁大，超抵飲！味道亦調得相當唔錯，值得一讚係佢哋嘅無限添飲同香港嘅同類餐廳好唔同，喺香港要舉高隻手甚至 3 催 4 請至幫你 refill ，亦免費附上唔耐煩嘅眼神一對。檸檬茶亦只會 refill 紅茶，主動幫你走糖、走冰兼走埋檸檬 . . .

呢度呢？侍應見我哋就快飲完，主動走埋嚟問有無需要嚟多杯，仲要係一整杯上，我前後飲咗 3 杯，抵到爛呀！

Ice Tea 唔知幾錢杯，因為係免費嘅！我哋去關島之前手上已有一本超級 jetso 天書 Guam Food Today ，憑 coupon 幫襯呢度即送 Ice tea 一杯，更一樣可以無限添飲，爽呀！

Flame Grilled Ribeye (US$21.49) 係呢度嘅招牌菜，必試！呢度鋸扒跟蒜蓉包之餘，仲可以任揀 2 款配菜，我哋選咗炸薯條及原條粟米。我哋兩個 share 一碟竟然飽咗。

原條粟米大大條，粒粒飽滿，味道甜得嚟好天然。

蒜蓉包熱烘烘，咬落香口鬆脆，蒜香味濃。

炸薯條係連埋少少皮即叫即炸，熱辣辣但又唔油膩

肉眼扒採用 12oz 重嘅 USDA Choice 級肉眼去燒。

鋸靚扒豈能無靚刀？呢度都係用 Delco 切肉刀，雖然無 Sea Grill 嗰把咁靚，但都係貴嘢嚟嘅！

肉眼扒亦做到要求嘅 medium rare ，肉質鬆化又 juicy ，肉味都幾濃，但優質程度比 Sea Grill 餐廳略為遜色。

咁夠肉味，唔駛好似喺香港食扒咁要落醬汁提味。

Molten Chocolate Cake (US$7.99)，係 Chili's 嘅皇牌甜品。

Molten Chocolate Cake 即係焗朱古力軟心蛋糕伴雲呢拿雪糕，簡稱心太軟。呢件心太軟賣相一流，軟心蛋糕做形猶如火山一樣，再喺頂部放上一大球雲呢拿雪糕。