不眠王子

香港文華東方酒店快船廊 Sunday Brunch 甜品篇

由不眠王子於 2013年03月18日發表人氣：1397

電郵給朋友

上一篇寫了香港文華東方酒店 Clipper Lounge 快船廊 的 Sunday Brunch 頭盤，今日講甜品吧！因為一提起香港文華東方酒店，朋友無不想起他們的芝士蛋糕及各種甜品。真心講句，無論自助餐或 Sunday Brunch ，個人認為文華酒店的甜品，是全港最強的。所以近幾個月每當有朋友叫王子推介自助餐時，我都會推介 Clipper Lounge ，因為單係甜品已足夠你達到食 buffet 的目的了。

步進 Clipper Lounge 首先見到的，便是甜品區，想試齊超過 30 款甜品絕非易事，好彩幾個月前在這裡食過自助晚餐，試過了多款甜品，今次便輪到試之前未食過的款式吧！

相中那大大盤朱古力塊堅好味的，只係忘記了獨立拍照。

甜品區中，雪糕始終係最受歡迎，這裡的雪糕是自家每日新鮮製作，有 6 種口味。

當日供應的有朱古力、呍呢嗱、士多啤梨、芝麻及綠茶 5 種雪糕，還有最右方的檸檬雪葩。

雪糕球 size 相當迷你，想 encore 的話要行多幾轉了。

亦可以叫廚師多添一兩球的。

再唔係可以學王子咁厚面皮，將隻餐碟交給廚師，來一個雪糕全 set 吧！

當日我作出這個要求時，負責的餅廚妹妹有少少怕羞咁問王子係咪 Blogger ，我有點儍更更咁答係，然後佢再怕怕羞羞問我係咪不眠王子，話佢有睇開我個 Blog 架！

作為一個幾十歲的老人家，有人認得，開心之餘其實有點尷尬，我好似忘記講聲多謝捧場呢！

雜果大拼盤內的新鮮生果接近 10 種，除了火龍果外，我全部都唔會錯過。

芒果慕絲蛋糕其實無形容的必要，香軟綿滑是一定的。

黑加侖子海綿蛋糕就更加非吃不可啦！

Tiramisu 大大盆，質感軟滑有酒香，係每次都要捧場的甜點。

芒果椰汁西米布甸絕對有驚喜，記得要先由深處舀起，芒果相當鮮甜之餘布甸透出濃濃的椰奶香，好味到我食了兩碗才收手。

Cherry Trifle 係傳統的英式蛋糕，吉士醬跟朱古力蛋糕層層疊，車厘子更充滿了酒香，又係一定要試的。

朱古力松露蛋糕朱味勁濃，蛋糕食了半件已有膩膩的感覺。

文華芝士蛋糕係名物，即使 11 成飽，點都要試試的。如果你食 Sunday brunch 主要係為了甜品而來，那就更加要食多幾件了。

厚厚的曲奇忘了試，所以 no comment！

咖啡奶凍香滑得來咖啡味比較輕盈，稍嫌不夠濃。

Cherry Clafoutis 法式櫻桃布甸係傳統的法式甜點，但唔多覺香港的法國餐廳有得供應。焗到香噴噴，甜而不膩，必試！

朱古力慕絲杯加了不少朱古力豆，入口滑溜之餘又有咬口。