不眠王子

Sea Grill 關島人氣夏威夷風味餐廳

由不眠王子於 2010年06月14日發表人氣：1295

電郵給朋友

今次去關島，最最最開心喺城中人氣食店 Sea Grill 享受咗一餐 150% 超滿意嘅晚飯，雖然埋單差唔多成千蚊港幣落樓，但一流嘅環境，6 星級嘅服務加上超水準嘅美食。坦白講，喺 Blog 寫咗成千間食肆，單係服務水平呢間肯定列入三甲。

Sea Grill 位於關島杜夢灣購物中心區嘅心臟地帶，喺正 Duty Free 對面，附近全部都係 Prada 、Ferragamo 、Celine 、LV 、Dior 等一座座嘅名店，所以一啲都唔難搵，況且建築物頂上有一條露出上半身嘅大鯨魚作標記。

咁大座、咁有氣派嘅餐廳，喺關島算數一數二。

餐廳正門設計融合附近嘅其他名店，似 Tiffany 嗎？

門口對出有座海豚雕塑，咁仲搵唔到我就幫你唔到

餐廳接待處猶如大公司一樣，未有位可以喺對開嘅偏廳坐坐，Sea Grill 左邊係餐廳 . . . .

右邊嘅係酒吧區，去呢邊食飯亦可以，而且酒吧區 3 邊都係落地大玻璃，個 view 對女仔嚟講係超吸引嘅！

See？呢面向正 LV、Cartier . . . 女朋友睇到雙眼放光

呢面更攞命，Prada、Ferragamo、Celine、Dior、Bvlgari

如果女友生日，就更加要帶佢嚟！點解？去片 . . .

成班侍應喺樓底咁高嘅餐廳有節奏咁拍晒手送上生日歌及生日 cut cake ，Imagine 吓場面幾咁震撼、幾咁冧呢！

圍住大大個吧枱嘅，係個靚靚嘅魚缸。

真係有魚游嚟游去，侍應仲講笑問我食唔食刺生添

鯨魚半身跳出屋頂，下半身呢？忠於原著喺餐廳內。

餐廳主打夏威夷菜，而總廚晚餐推介每 2 個星期轉一次，一場嚟到，當然 order 一、兩款捧吓場啦！

美食未到花先到？點好菜後，靚仔又大隻嘅侍應生 Stanley 仔用餐紙巾捲成白玫瑰，情深款款咁送俾王妃 . . . 哼！老土到爆 . . . 但最慘真係有人受 . . . 王妃即時面紅，之後仲窒鬼我，內容唔駛我講都估到啦！

不過，Service 好到咁又確係值得一讚嘅！

Sea Grill Crab Dip (US$12.95) 係夏威夷嘅人氣小食，亦係呢度嘅招牌菜之一，香口惹味，必試！

焗蟹肉醬選用新鮮嘅矜貴雪蟹肉 (又稱水晶蟹) 配以菠菜，再喺上中下分 3 層加入 parmesan 、mozzarella 及 cream cheese 一齊焗，唔香噴噴至奇。就咁食？都得嘅！但係 . . .

放喺熱烘烘嘅香脆蒜茸包上面一齊食更正。

將蟹肉塗勻喺蒜茸包之上食又得 . . .

舀面層嘅芝士連蟹肉食又有另一番感受。

Fried Poki (US$10.95) 亦係夏威夷菜式，通常將新鮮吞拿魚切粒，再用醬油及各種配料醃製，再輕煎一吓即成。

放幾粒吞拿魚肉喺飯上面，即成美味嘅吞拿魚卷。

吞拿魚粒粒肉質飽滿，咬落去勁 juicy ，頭盤必選。

Grilled Ribeye Steak (US$26.95) 用 12oz 嘅 USDA Choice 級肉眼扒入饌。價錢貴嗎？但跟香港一般食到嘅同級同價肉眼相比，呢度嘅 ribeye 肉味更濃，亦燒得好有心機，咁嘅質素喺香港扒房分分鐘要 300 蚊至落到樓。

炭烤肉眼扒嘅配菜揀咗薯蓉，係用新鮮薯仔打成噃！正！仲加咗啲煙肉粒入去，食落綿密之餘又有啲咬口。

肉眼扒睇相都估到有幾正啦！

鋸靚扒豈能無靚刀？Delco 木柄切肉刀？貴嘢嚟喎！

食優質肉眼扒，我會食 medium rare ，肉味濃啲嘛！

紅酒色嘅肉眼靚到殺死人，肉質勁鬆化、超 juicy！

Monk Fish with Fettuccine Pasta (US$28.95) 喺 menu 內係本周總廚推介嘅 3 款主菜之一，照點包穩陣，Monk fish 即係鮟鱇魚，關島有咁多日本人，而鮟鱇魚被日本人喻為魚中極品，一睇就知呢道菜要吸引邊班食客啦！

鮟鱇魚闊條麵仲用咗龍蝦忌廉汁去煮，捲起一條放入口，即時感覺到香濃嘅龍蝦汁非常之鮮甜。

鮟鱇魚肉質結實彈牙，口感有啲似龍蝦肉，超好味！

Chocolate Lover's Cake (US$5.95) 係總廚推介嘅甜品，唔好以為賣相無乜特別就係普通料，我唔知點用貼切兼流暢嘅中文字去形容，唯有照抄餐牌啦！

"Layers of Chocolate Cake and Chocolate Mousse covered with Rich and Creamy Chocolate Ganache".

簡單講就係，朱古力戀人蛋糕香綿軟滑、朱味香濃。

2 杯特飲睇相你未必察覺到，其實個杯仲大過飯碗，成個拳頭放落去都仲有位剩，單手攞起都有啲吃力，咁咪好貴？又唔係喎！幾蚊 . . . 美金之嘛！但 2 杯價錢相差一倍，因為其中一杯有酒精成份嘛！

Tumon Bay (US$7.95) 即係杜夢灣，呢款雞尾酒由藍橙酒、冧酒、密瓜酒及果汁混合而成，甜甜哋好易入口，飲晒咁大杯都唔會醉，最啱女仔飲。

Strawberry Lemonade (US$3.95) 肯定係關島最受歡迎嘅飲品，今次喺關島去到邊都見到喺 menu 中主力嘅飲品。咁大杯都係 HK$30 ，抵飲到極！

關島好多餐廳都係收 15% service charge ，埋單亦最好另俾貼士，呢餐埋單本來要 110 蚊美金多啲！唔知點解 2 杯特飲無入到單，變咗 US$98.61 就攪掂。但我哋見侍應 Stanley 全程照呼週到，又氹到王妃鬼咁開心，於是碌卡埋單之餘，再俾多 10 蚊美金貼士 . . . Well！我哋覺得值囉！

臨走仲有一小包總廚自家製曲奇送俾我哋添！好味！

電話 : (671) 649-6637 平均消費 : US$40 - US$60 / 位

地址 : 1245 Pale San Vitores road. Ste.450, Tumon, Guam

分享到 facebook

上一篇： Magellan 關島日航酒店早餐 Buffet

下一篇：御膳飯莊隱世秘店滿地眼鏡碎