不眠王子

關島自遊之旅 Day 1 黎明鴨仔

由不眠王子於 2010年05月25日發表人氣：778

電郵給朋友

Hafa Adai！我返咗嚟啦！呢張相唔係 copy 人，真係自己喺所住嘅日航酒店影出去架！上星期去咗關島叉電，個人心理上精神咗，生理上殘咗 . . . 因為晒傷咗，當地真係好陽光，UV 值據講比香港高 6 倍，用 85 度防晒都唔掂呀！

不過真係無揀錯地方，個人覺得比芭堤雅、馬爾代夫更好玩，景靚、人靚 (無論男 or 女)，只係當地消費都幾貴吓！帶去嘅美金未到 last day 都清晒袋 . . .

最好笑係咁多日都俾全世界當咗我哋係日本遊客，無法啦！咁多日撞口撞面嘅 99% 以上都係日本人，好彩王妃識日文，我又識少少，所以都 OK 嘅！

自從知道 4 月開始香港再有直航飛關島，只有星期一及星期五有 2 班直航機，所以揀星期一夜機去。

見過香港啲旅行社所謂 5 天團有啲搵笨，因為夜晚 10 點半上機，又唔係早機去，飛 4 粒半鐘到目的地，去到關島已經 5 點半 (比香港快 2 粒鐘)，點計都係 4 日 3 夜之嘛！

直航係搭美國大陸航空公司嘅機，機仔細細，坐得唔係太舒服，好彩航程唔算長，都 OK 嘅！

飛機餐簡簡單單，比澳門船上食到嘅仲要差啲啲 . . .

有啲似土耳其烤雞肉卷，所以雞肉都幾嚡吓 . . .

入境隨俗，循例影張老土相，關島，我嚟啦！

關島清晨 5 點半，咁早做乜好？參加當地嘅 4 小時短線遊，到市內觀光，然後返酒店 check-in 、食早餐，Fit 晒！關島嘅酒店朝早 9 點已經可以 check-in (peak season 除外)。

我唔係坐呢架，只係見架車咁靚，影張相。今次參加個團有成 over 40 個香港人，都算少有，據講平時頂盡得 20 人咋！但住日航酒店嘅就只得我哋 2 個 . . . 房租貴嘛！

到市區觀光前，先去 24 小時營業嘅 K-Mart 買清水，因為關島嘅水唔適宜飲用，K-Mart 係全關島最大嘅 supermarket ，乜都有得賣。我哋試過夜晚 10 點嚟，行到兩點幾至走，仲要係未行晒嗰隻 . . . 因為地方實在太大啦！而市內有得賣關島嘜頭嘢朱古力、紀念品以至出名嘅關島芒果乾嘅商店，價錢都平唔過 K-Mart ，所以買紀念品或手信，最好係 last day 喺 K-Mart 搞掂晒就 OK！

BB 彈？芝士波嚟架！好多當地人買架！

邊度都有陽光 . . . 但無理由咁遠嚟到買佢呱？

新奇士原來有好多款果汁飲品 . . . .

拉堤石公園仲細過我屋企樓下個公園，一眼睇晒。8 座巨型拉堤石係關島南部最原始嘅遺蹟，拉堤石傳說中係古查莫洛人房屋嘅基柱，好有歷史意義架！

一朝早撞正返學時間，好有懷舊 feel 嘅黃巴士呀！

西班牙花園廣場又無乜特別咁 . . . .

最特別係啲蝸牛有手板咁大隻 . . . 個殼仲幾靚添！

聖母瑪莉亞教堂有 340 年歷史，都幾靚架！

情人崖絕對值得去行吓，可以鳥瞰菲律賓海及白沙海岸，同關島中部嘅美景。

日本送俾關島嘅鐘 . . . 送鐘 . . . .

想多吓傳說嗰對查莫洛戀人跳崖殉情嘅位置？多謝 3 蚊美金。但無乜人俾錢入場 . . .

唔駛上展望台，望上去個 view 一樣咁正。