不眠王子

星馬殿 Encore 華麗星馬菜頭盤甜品篇

由不眠王子於 2010年03月12日發表人氣：478

電郵給朋友

又到王子周末推介啦！上個星期五講過喺 星馬殿 食完第一餐飯後，老闆邀請王子幾日後再嚟試菜及俾吓意見，於是王子就同 Blog 友嘉嘉、Tako 及超愛紫色嘅 Jessica 一齊嚟，有美食當然要齊齊分享啦！當晚大家食得有幾興奮？由黃昏 6 點鬆啲一直食吓、傾吓、影吓直到 11 點幾，足足食咗 5 粒鐘。睇咗佢哋喺 Openrice 嘅食評都知道佢哋對呢間餐廳有幾滿意啦！

話明星馬式餐廳，用料當然夠正宗啦！就連配料都用新鮮靚貨，其實你哋睇相都應該留意到啦！

脆炸紫蕃薯 ($20) 係用嚟送酒嘅最佳小食，熱辣辣嘅紫蕃薯條香口到極、薯味十足，一個人食一碟都唔過份。

班蘭雞翼 ($35) 用班蘭醬將雞翼以類似天婦羅嘅做法炸成，雞翼炸得香口，肉質嫩滑，食多多都唔厭。

南薑汁米茄子 個 look 好靚，味道亦好特別。

泰國迷係茄子細粒到好似手指尾咁大隻，放喺支大匙羹度相映成趣。浸咗南薑汁後甘甘哋之餘有啲啲香辣。

水牛芝士冬菇 用墨魚膠釀落鮮甜嘅冬菇度，一咬落去，水牛芝士流到滿口都係，第二次食依然咁好 feel！

密封優質牛肉配芥茉歐芹 係全晚唯一失手嘅菜式

優質牛肉有幾優質我唔知，只係知道肉質韌得交關

意大利青瓜蟹肉豆腐 賣相精緻，意大利青瓜的的式式細細粒，係總廚朝早喺中環街市發現而忽然靈感到，即興做咗呢份頭盤。

蟹肉鮮甜、豆腐滑溜，個汁好香 . . . 但有啲奇怪，飲落有少少中藥味，即刻問一問，原來個汁係加咗當歸嘅肉骨茶，咁有創意嘅星馬菜值得你嚟試吓！

咖央肉鬆多士 有少少台式 feel ，麵包係同有名嘅麵包店特別訂做嘅黑糖麵包，多士即叫即製，趁熱食勁好味。

豬肉鬆都係總廚自家製嘅！肉味香濃，口感無出面啲肉鬆咁韌，食完好想同總廚講 . . . 好想買包肉鬆返屋企。