不眠王子

星馬殿 Encore 華麗星馬菜熱葷篇

由不眠王子於 2010年03月12日發表人氣：481

電郵給朋友

星馬殿 呢次 encore 影咗超過 200 張相，點 cut 都剩番 50 張，唯有分開 2 篇 Blog 出。講番呢篇，咁大個仔都未試過食西式嘅星馬菜 . . . 每道菜嘅精緻賣相令人有享受法國菜嘅感覺，今次除咗試 Tasting menu 內其中 4 款主菜，仲食咗佢哋嘅招牌菜 無骨鴛鴦海南雞飯 添！

青檸檬香葉茶 ($20) 有朋友仔點咗杯熱嘅！試咗一啖 . . . 我都係鍾意飲凍嘅！

青檸檬香葉茶 ($20) 正到我飲上癮，唔想試其他飲品

無骨鴛鴦海南雞飯 ($68) 跟班蘭飯及五香清湯，平日喺午市至有得供應架！碟飯一上到枱，4 把口好齊咁嘩一聲嗌咗出嚟！與其話佢係一碟飯，不如話係一件藝術品。

大大隻白色碟十足十畫畫嘅調色碟，醬汁 3 小碗一字排開將 2 款海南雞分隔開，整個構圖都充滿美感。

點解支叉同匙羹咁巨型嘅？比標準 size 大一倍以上，好似舀沙律嘅大匙羹咁，其實係用嚟當公叉及公羹架！

食海南雞通常係都跟油飯，跟班蘭飯 . . . 都係第一次食，感覺無油飯咁油，但一樣咁香，飯粒層次分明。

無骨海南雞係用咗新鮮嘅清遠雞，雞皮爽口、雞肉嫩滑有雞味，一食就食得出。

無骨黃金海南雞賣相有啲似炸子雞，但肉質就似海南雞咁嫩滑。原來雞皮係經星加坡黑醬油浸過，唔怪得望落咁似炸子雞啦！上面仲放咗一大片金箔，富貴到呀！

兩款海南雞本身已經相當夠味，唔需要再蘸醬汁。

跟住就試 $380 Tasting menu 內嘅菜式，一份 Tasting menu 冷盤 5 選 3 ，熱盤 6 選 3 ，另外飯、麵、喇沙可任選其一，最後嘅甜品亦係 3 選 1。一個人未必食得晒！2 個人嚟唔好食 2 個 tasting menu 呀！點一個再加多個 standard menu 上嘅主菜，足夠到極。

我哋呢餐因為係免費，所以試嘅款式同份量比較多

喇沙醬虎蝦 烤到香噴噴，蝦頭仲勁多膏，唔好錯過

虎蝦肉質結實超彈牙，食落仲有陣喇沙香味，超正！

馬拉醬羊肋骨肉 賣相夠吸見，香噴噴惹味到極！

羊肋骨肉雖然落咗馬拉醬，但仍帶有少少羶味，肉嫩鬆化易入口，比出面食開嘅羊架少咗幾分韌度，好味！

帶子配釀蘿蔔 唔知帶子係咪嚟自北海道，超大隻呀

咁大塊橙色嘅係乜東東呢？估中無獎 . . . .

帶子等其他女仔 friend 去分，我就食軟腍嘅甜蘿蔔。

五香魚 一如其名香噴噴，採用五種香料去烹調靖魚

魚雖香，無奈我同旁邊嘅 Jessica 都唔食得，無嘢好講

唯有鬼鬼鼠鼠食蕃薯啦！上面綠色嘅係迷係椰菜

再次多謝 星馬殿 嘅熱情招待，仲俾我帶埋 3 個為食妹嚟攪攪震，好快我又會真金白銀再嚟食過，到時見！