不眠王子

拿督星馬冰室星加坡陳太回歸

由不眠王子於 2010年03月08日發表人氣：586

電郵給朋友

拿督星馬冰室 雖然係新開張，其實佢即係以前喺尖沙咀，之後搬咗去北角，而家喺小西灣開店嘅星加坡陳太星馬娘惹菜，以前幫襯過，今次再去算返兜啦！

地方比以前細咗、吊腳咗，我估係遷就舖租嘅關係吧！冰室可容納 50 至 60 人左右，雖然有卡位，但如果 2 個人去，要有心理準備隨時被要求搭枱，我寧願坐大圓枱舒服啲。侍應招呼尚可，但晚市爆起上嚟都有少少亂，始終係新開嘛！全店繼續以陳太拿手嘅星加坡菜作主打，大廚亦係嚟自星加坡，因為係冰室，所以免收加一。

餐牌上有唔少頗有特色嘅名字，以粉麵款式較多，小菜比較少，如早餐竟有香煎菓皮鯪魚餅丁麵、生煎香茅豬扒多士、即灼薑汁豬潤老鼠粉等，晚上招牌菜有各種星加坡咖喱菜式，全場最多人點咖喱麵包雞及以下菜式。

2 個人食晚飯，$200 有找，都算幾抵食。

星加坡肉骨茶 ($48 / 細) 其實都幾大碗吓！夠 2 個人分

肉骨茶相當足料，有大量豬手、冬菇、排骨等，煲得夠火候，但味道稍嫌唔夠濃，藥味亦唔算重，有啲失望。

馬拉盞醬汁灼魷魚通菜 ($35) 醬汁香甜又惹味。

魷魚份量唔算多，但彈牙鮮味，通菜亦爽甜無渣。

檳城鮮黃牛筋黑豉油乾撈麵 ($32) 可揀撈粗或撈幼

黃牛筋份量唔算多，仲溝咗啲牛腩落去，牛腩有少少韌，不及牛筋軟腍入味咁正，寧願佢俾晒牛筋我好過。

黑豉油乾撈粗麵非常入味，麵身爽口又多汁，好味！

燒香辣蒲魚 ($42) 惹味十足，必食！蒲魚即係魔鬼魚，係星加坡常見嘅街頭小食，坊間比較少見。

先用黑醬油搽勻魚身再煎香，滴少少青檸汁就食得

蒲魚外層燒得香脆，魚肉嫩滑到不得了，而中間一排嘅軟骨部份都可以食架！仲含有豐富膠質添！