不眠王子

星泰真味真係有味味精個味

由不眠王子於 2010年02月22日發表人氣：396

電郵給朋友

樂富嘅吉之島進入最後嘅結業倒數，近幾日個場自然多咗好多客，想醫肚自然會到旁邊樂富廣場內嘅食店，我已試晒咁多間新店，結果係強差人意，尤其是 3 樓大部份嘅食店都令人失望，質素比美心、大家樂還要差得多，上個月寫咗 膳坊 ，今日就講旁邊嘅 星泰真味 吧！雖然個名有星泰 2 字，但跟膳坊一樣，只係間港式茶餐廳，最好笑係大家嘅出品都差唔多，就連水準亦係海軍鬥水兵。

不過當晚遇到 2 件事，令我決定唔會再去幫襯。

呢度食飯叫餐飲，熱飲加 $3 ，涷飲加 $5 ，特飲加 $8 ，當晚點紅豆冰時，侍應隔咗好耐先至話無紅豆冰，雖然覺得奇怪，但都改飲凍檸七 (原本加 $5) ，但埋單睇清楚，張單竟然寫住紅豆冰兼照加 $8。

更離譜嘅係另一杯餐飲叫咗雪糕阿華田，侍應之後攞住杯凍華田埋嚟同我話無晒雪糕，飲凍華田啦 . . .

嘩 ~ 老屈都得？我見有雪糕阿華田咁特別至 order！無就應該同我講聲，睇吓轉飲其他飲品，而唔係就咁攞杯凍華田俾我算數。如果我點凍奶茶，你無晒奶，咁我咪要飲凍茶？但最痴根都係張單竟然照打雪糕阿華田 . . .

蝦醬炸雞翼 ($32) 嚟到 O 晒嘴，就咁得 5 隻雞翼仔收 $32？人哋至少都有啲青瓜片、蕃茄片拌碟嘛！都算啦！一咬落去，咦？唔熱嘅？無蝦醬味嘅？咁即係 . . . .

即係就咁普通炸雞翼囉！