不眠王子

UCC Coffee Shop 富麗堂皇青衣店

由不眠王子於 2009年12月14日發表人氣：492

電郵給朋友

幫襯 UCC 始於 Sogo ，我諗都有 20 年吧！當年俾公司派咗去銅鑼灣分店做咗段日子，周末放工總會行吓 Sogo ，而 Sogo 內幾間唔同 style 嘅 UCC 肯定幫襯咗超過 100 次，尤其係體育用品部對面嘅 UCC Cafe City 21 ，雖然之後都有食過其他 UCC ，但總係覺得水準唔及 Sogo 店 . . .

但講到最 Grand 嘅 UCC Coffee Shop，肯定係青衣城店

單係橫誇幾個舖面嘅拱門設計已經相當有吸引力

嘩 ~ 呢度係 . . . 係呀！都係 UCC 入面嘅格局，唔講仲以為去咗間高級西餐廳，盡頭處仲有高貴浪漫嘅情侶卡座，聖誕喺度平食個聖誕晚餐，再同另一半出去商場外嘅海濱長廊行吓，都幾好 feel 架！

講 service ，日式西餐廳通常都有番咁上下，好唔好食就見仁見智，我覺得中規中矩、OK 食得過啦！

主菜加 $28 轉餐，跟湯跟飲品兼有得玩自助沙律吧，抵到爛，唔加就笨，沙律吧有薯蓉、青瓜、螺絲粉、啫喱、粟米、車厘茄、紅腰豆、吞拿魚、生菜、菠蘿、蜜桃等 18 款配料及 3 款沙律醬任配搭，雖然只準玩一次，但現場見唔少人都可以堆到盤滿砵滿，滿載而歸。

羅宋湯酸辣度適中亦夠熱，配料亦有唔少，合格嘅！

沙律醬夠凍夠杰身，正！

我唔算狼啦！夠就算啦！至討厭啲人慌死執輸咁，攞完一大盆但又食唔晒，不知所謂！

薯蓉真係唔錯，口感夠綿密，吞拿魚亦幾好味。

王妃盤沙律罐頭為主，粟米、菠蘿、蜜桃都係罐頭貨

減咗餐湯同飲品，沙律圍到 $10 左右，抵過散叫 $35

茄味牛油奄列飯配牛肉汁 ($68) 其實唔係蛋包飯，只可以叫佢做蛋蓋飯或奄列飯，賣相唔錯嘅！