不眠王子

樂活一館 La Vie 女人街意式菜

由不眠王子於 2009年11月24日發表人氣：1014

電郵給朋友

喺自己個 Blog search 吓！發現單係寫女人街嘅食店，原來差唔多有 40 間，好鬼邪呀！樂活一館 La Vie 又係喺女人街，仲要以意式菜做主打，女人街地舖嘅同類西餐廳唔超過 5 間，我已經試過晒，La Vie 一定好食過 Dates . . . 好多，仲要無 Dates 咁貴咁搶錢。唯一要挑剔嘅，係呢度嘅水吧幫間餐廳倒米，啲特飲 . . . 真係特別難飲呀！拖低晒啲分數。

雖然地方唔大，環境亦逼咗啲，但都坐得幾舒服嘅！

我幫襯呢度已經係幾個月前嘅事，嗰陣仲有咁 jetso 嘅 $1 美食優惠，唔知而家仲有無架！

雖然呢度嘅晚餐價錢相當經濟，但 2 個人食滿 $100 有幾難？換定一樣先 . . . .

香芒煙三文魚卷 ($32) 估唔到 $1 嘅水準都絕不馬虎，就算要我俾足原價 $32 都會照樣 order ，$1 就更驚喜啦！

沙律菜同芒果相當 fresh ，煙三文魚亦肥美，味道幾夾

La Vie 三重奏 ($98) 係呢度嘅招牌菜，呢個 dinner set 包括前菜煙鴨胸沙律，而主菜三重奏分別有紐西蘭牛柳、香草燒羊架及香檳海鱸魚柳，配埋意粉、甜品及餐茶都係 $98 ，食完肯定飽到要捧住個肚出門口 . . .

煙鴨胸沙律 賣相 OK 喎！沙律菜相當新鮮，煙鴨胸係就係薄咗啲！但夠大塊嘛！厚切但俾一片仔你咪仲肉酸！

香檳海鱸魚柳 煎得夠香，肉質亦嫩滑，意粉夠爽彈

紐西蘭牛柳 都幾大件幾厚身，入口肉質夠鬆化，肉味仲相當濃，兼多汁到一口都係，廚師水準有番咁上下。

香草燒羊架 睇吓幾大件、燒得幾靚，同樣價錢喺出面食到嘅通常都係啲又黑又韌又羶又無肉嘅貨色，醃得咁好味又咁好肉嘅羊架，喺女人街都係第一次食到。

想食得經濟啲可以試吓自選 DIY 意粉或意大利飯，$48 夠晒抵食。俾多 $20 仲跟埋餐湯、蒜茸法包及餐茶添！

蒜茸法包睇樣就唔錯，但一咬 . . . 又冷又硬，失望！