不眠王子

新翠華小廚炭燒煲仔飯萬歲

由不眠王子於 2009年11月19日發表人氣：797

電郵給朋友

天氣凍冰冰，個個 friend 都叫我講吓煲仔飯，但坦白講句，而家周街都係用 gas 爐貪快貪方便，好少有人用又煩又浪費時間嘅炭爐。連個煲都用晒傳熱更快嘅金屬煲，瓦煲買少見少啦！Gas 爐煲金屬煲嘅煲仔飯試過唔少，同炭燒煲仔飯比 . . . 完全無得比呀！無計啦！呢一代唔少人都要急要快，最好落完單 3 分鐘內就有得食，唔去用個腦諗吓好多美食都需要一定嘅烹調時間 . . . 唉！

如果你自問係個無耐性嘅人，咁你無必要再睇落去

新翠華小廚 正正係出名食炭燒煲仔飯嘅 新翠華茶餐廳 嘅分店，由於呢度新開無耐，又喺東寶小館後面，所以唔係咁多人知。但呢度地方大好多，衛生環境亦比銅鑼灣店好得多，最意外係連 service 都唔錯，阿姐好好招呼，食完仲會問吓你意見，但最緊要都係炭燒煲仔飯超掂。

新店除咗煲仔飯，仲有好多小菜選擇，價錢豐儉由人，但一定無東寶搶錢得咁狼死，我成餐飯計埋都唔夠喺東寶食碟搵笨黃金蝦 . . . 當然，妳可以跟阿麗梅食餐貴嘢，但老實講，避風塘炒蟹咁惹味，無理由配煲仔飯囉！

呢度嘅炭燒煲仔飯明顯比舊店出色，第一，呢度係清一色用炭爐，而銅鑼灣店其實有部份爐係用 gas 爐。

第二，負責炭燒煲仔飯個阿叔非常專業兼全神貫注

第三，呢度連煮飯嗰煲水都係用炭爐燒嘅！堅呀！

阿叔非常熟手咁落完生米，就用炭爐煲熱嘅水倒落瓦煲度煮飯，而右邊嗰煲飯就快熟啦！睇見就興奮呀！

阿叔見飯開始成形就開始落配料，蓋好煲蓋慢慢煲

落單到炭燒煲仔飯上枱，全程要 20 分鐘，唔好催呀！

阿姐會幫你打開個煲蓋，淋少少豉油，再蓋番個蓋兼提醒你焗 2 、3 分鐘先好開，真係唔夠豉油就自己加 . . . 係咪好貼心呢？

臘腸排骨煲 ($38) 熱氣騰騰，足料炮製，梗係抵食啦

阿姐好手勢，無須多加豉油，炭香攻鼻，Take action 啦