不眠王子

芭堤雅小廚 Pataya 泰 ● 創新

由不眠王子於 2013年01月07日發表人氣：916

電郵給朋友

周末拍拖入大埔單車遊，晚飯王妃想食泰國菜，見佢上食評網睇食評，冬蔭公、泰式串燒、炸軟殼蟹、菠蘿炒飯、炒金邊粉 . . . 好悶，悶到爆呀！點解香港人食泰國菜來來去去都只係懂得點這幾款菜？餐牌裡就只有這些菜式嗎？

泰國菜其實有唔少既精緻又精彩的菜式，今個星期帶大家去食泰國菜，第一站去 Pataya 芭堤雅小廚。

Pataya 位於大美督，對住幾間大型租單車的檔子，好易搵的。店子地方大、樓底高、坐得尚算舒適，店旁還有露天雅座。店員亦招呼一流，尤其是帶眼鏡的那位疑似老闆娘，我企喺門口一陣，已聽到佢落力落咀頭 : 我哋啲菜碟頭好大份架、廚師係泰國人嚟架、入嚟試吓啦 . . . 食到中途，又見佢會問問食客意見、對某些菜式又會有溫馨提示，教你正確食法。單係服務一 part 我會俾滿分。

打開餐牌，菜式款多，有唔少更相當具特色，見鄰枱又係食冬蔭公、炒金邊粉 . . . 救命呀 ~ 好！等我試試另類的。

青檸梳打 (左)、咸檸七 (右) 同樣係 $24 ，比九龍城一帶貴咗少少，亦細杯少少。前者唔太夠氣、得個酸字。都係後者穩陣一點。

龍眼冰 ($24) 味道反而正正常常，甜度適中。

生蝦刺身 ($88) 餐牌無的，因為新鮮的草蝦並非經常買到，想食的可以向店員查詢。這裡一碟 9 隻，做法是一蝦兩食，蝦頭炸到卜卜脆，抵食的。

新鮮的生蝦肉質固然爽口鮮甜，但上面的香口辣醬至係靈魂所在，真係辣到個人都醒一醒，怕辣的宜清走一半辣醬先放隻蝦入口吧！

冬蔭烏冬啫啫煲 ($78) 單係個名已經夠特別啦！冬蔭公、烏冬、啫啫煲組合埋一齊會係點樣？叫得啫啫煲，上到枱時當然係熱氣騰騰啦！但最好即時先將煲內的烏冬翻幾翻，否則會好快黐住煲底。

烏冬滲出冬蔭公的微辣濃香，煙韌好咬口。蝦肉隻隻爽口彈牙，惹味到暈，一煲夠兩個人分了。

炸通菜 ($74) 起初見到個價錢確實有少少猶疑，通菜要賣 $74？北海道入口的嗎？但上到枱，我同王妃都呆住了，通菜大碟到猶如一座小山丘，旁邊用作蘸通菜的酸辣海鮮肉醬汁，亦大碗到可以獨立當作一道菜用來送飯了。

炸通菜唔係未食過，但一般只係有層薄薄脆粉包住通菜，咁巨型的炸通菜你又見過未？大大份只因加了大量蛋漿去炸，即係有點似大家熟悉的煎蠔餅，但入口毫不油膩，就咁食已經夠香口鬆脆。

至於用來蘸炸通菜的酸辣海鮮肉醬汁 . . . 確實大碗到可以獨立當作一道菜用來送飯，因為碗內有大量蝦肉、魷魚、豬肉及其他配料，醬汁酸中帶微辣。將肉醬淋上炸通菜，又係另一番惹味。

蝦皇公 ($158) 超大碟，採用 3 隻 size 大過手掌的大頭蝦開邊製作，賣相有點似咖喱炒蟹，連店員都話極少人點過這道菜，我食完之後覺得大家走寶了。

大頭蝦肉厚、鮮嫩、爽彈，醬汁濃稠，甜中帶椰香，味道極似咖喱炒蟹，如果唔係一早叫了烏冬，我真係好想叫碗白飯，將醬汁淋上去 . . .

埋單 $600 有找，兩個人飽到去了大型商場慢步個幾小時，消化之後才回家。