不眠王子

快靚正燒味粉麵茶餐廳三日兩夜狂瀉團

由不眠王子於 2009年11月12日發表人氣：703

電郵給朋友

食過好正嘅華南冰室、新香園，早排去開深水埗見附近呢間舖位大大嘅 快靚正燒味粉麵茶餐廳 ，於是同王妃一齊食個下午茶再上路，點知即日就出事，我食完唔夠 2 粒鐘就肚痛，晚飯都無去就即刻飛番屋企，當晚瀉咗幾多次真係數唔到，只知由黃昏瀉到第二朝近天光，前後瀉咗 3 日 2 夜至好番，王妃亦有中招，但無我咁嚴重。

一齊出事印象中都係第一次，究竟係以下邊樣嘢令我哋齊齊中招呢？我估係 2 杯餐飲 . . . .

雞中翼薯條 ($20) 包餐飲，雞翼細隻之餘係翻叮嘅！外暖內凍又硬身，薯條亦唔係即叫即炸，仲衰過牡丹樓。

沙嗲牛肉配豬扒一丁 ($21) 亦有跟餐飲，無諗到咁簡單嘅嘢都可以整到咁難食 . . . .

豬扒係一早煎起唔知攤凍咗幾耐，肉質又嚡又韌 . . .

沙嗲牛肉好腍 . . . 係俾重手梳打粉醃到好腍 . . .

出前一丁發晒漲，又唔熱，食落又唔彈牙，味道又淡，又無落麻油 . . . . 好似煮起咗好耐咁 . . . . 想點呀？

紅豆冰 超難飲，奶味怪怪哋！紅豆唔係爛就係硬，一人飲咗 2 啖就放棄咗！

凍奶茶 味道淡如水，又無茶味，小朋友沖得好過佢

早知差成咁，行多 2 步去新香園好過啦！

電話 : 2789 3009 平均消費 : $20 - $30 / 位

地址 : 深水埗基隆街 383 - 385 號地下

分享到 facebook