不眠王子

小菜王夠鑊氣有風味

由不眠王子於 2009年11月05日發表人氣：722

電郵給朋友

天氣仲係凍，所以今過星期講完燒嘢、煲嘢，今日就講鑊氣嘢，聽日講補身嘢 . . . 總之全部都係熱辣辣正嘢！

呢個世界好多嘢係相對嘅！食店生意越好，入貨就越多，價錢就越平，食材越清得快，自然越新鮮，小菜王 越做越大正係呢個原因，呢間巨型大排檔極容易搵，每逢夜晚，福榮街近石硤尾街一帶又黑又靜，唯獨是喺十字路口嘅 小菜王 燈火通明，離遠就見，做大排檔做到有幾個舖位、3 個廚房認真駕勢堂。怕熱嘅可以坐室內歎冷氣，想 feel 吓大排檔風味嘅可以坐舖外。

小菜王嘅海產選擇非常多，單是游水海鮮便多達 20 種，蝦類由幾蚊両作白灼用嘅小蝦到十幾蚊両嘅海中蝦、瀨尿蝦以至龍蝦都有得供應，價錢跟街市相差唔算太遠，唔好忘記佢哋幫你炮製之餘仲免收加一喎！

呢個角度影埋去，係咪以為我去咗洗手間呢？

其實只係咁啱坐喺靠牆張枱，廁紙俾你清潔雙手用

涼拌北海道海螺肉 ($48) 絕對有意外驚喜，喺食評網唔見有食友點呢道菜，你哋走寶啦！$48 有成打咁多架！

北海道海螺肉粒粒都咁飽滿，充滿光澤，新鮮到極。味道比我哋平時食開嘅螺肉更鮮甜、更爽口、更彈牙，食一粒包你停唔到口，就連拌碟嘅中華沙律都咁好味。

沙薑雞腳 ($38) 係王妃嘅飛佛，凡去大排檔必定 order

沙薑雞腳一窩份量相當多，出面食到嘅通常都係皮包骨，甚至甩皮甩骨，咁靚仔咁肥美嘅比較少見。

黑椒牛油炒蟶子 ($68) 都係第一次試，平時唔係食豉椒炒就係豉汁蒸，$68 有咁多蟶子肉幾抵食噃！

用黑椒牛油炒唔夠豉椒炒咁惹味，但肥美嘅蟶子食落多咗份牛油嘅香滑質感，味道毫不遜色，別有風味。

蒜蓉開邊蒸海中蝦 ($14 / 両) 要叫夠足 10 両至滿足到 2 個蝦癡，見魚缸內嘅游水海中蝦大隻又生猛，自然充滿期待，唔好以為 10 両有好多，呢度其實得 9 隻蝦咋！

睇見大部份海中蝦都有咁多膏，超開心！蝦肉鮮甜、結實彈牙，蒜香味十足，$140 . . . . 我覺得物有所值喎！

燒汁鰻魚炒飯 ($68) 係鎮店名物，有唔少人氣食家推介過，外表睇落平平無奇，一食先知果然名不虛傳。