不眠王子

趙學而聽聽 HQCD

由不眠王子於 2009年10月04日發表人氣：659

電郵給朋友

趙學而國語新碟《聽聽》終於順利喺上星期二推出，連續 5 日去咗全港超過 30 間唱片舖睇銷售反應同上架位置，每日不斷跟發行嘅公司聯絡睇實落單情況，因為同期實在有太多猛碟推出，Eason 隻宣傳聲勢浩大嘅國語新碟、Madonna 嘅超級精選 . . . 前者送記事簿，後者送襟章

學而隻碟唔玩送嘢，玩質素 . . .

玩 Live Recording : 即係同隊 band 一齊一 take 過錄全首歌

玩音效 : 全個錄音係用 24bit 192 kHz 高清錄製

玩音質 : 壓碟用而家日本最 hit 嘅 HQCD 碟

隻碟係貴啲，但同你平時聽開嘅本地流行曲 CD 一比，你會好開心原來香港仲有歌手咁認真去做一張專輯。

我自己喺街買咗 2 套限定版，其他嘅 HQCD 係人哋架！

01. 童話

用呢首歌打頭陣係有原因嘅！如果你一直咁聽落去就會明。全首歌只以一支結他作伴奏，除咗更突顯學而嘅動人嗓子，亦令呢首大家耳熟能詳嘅金曲增添新鮮感及更貼合歌詞中嘅意境

02. 如果你愛我

伴奏樂器比前一首歌增加咗，學而演繹呢首歌保留咗自己嘅風格，跟原來版本散發出唔同嘅韻味，原作嘅 rock 味比較重，而呢個版本感覺較為嬌柔，編曲聽起上來比原作順耳得多。

03. 熱情的沙漠

對聽過此曲嘅樂迷嚟講會有一定嘅驚喜，原來熱情都有好多方式去表達，一聽前奏嘅結他聲令我即時想起 Robert Cray 嘅經典作品 "Smoking Gun" (即係阿 Lam 嗰首 "花街 70 號")，首歌竟然大玩 R&B; ，跟原曲嘅狂野節奏簡直判若兩 "曲" ，頭一次聽時仲以為自己播錯歌，中段嘅鋼琴及尾段嘅結他 solo 精彩到拍攔手掌。

04. 有多少愛可以重來

呢首歌嘅驚喜程度亦絕對唔少，首歌有唔少歌手翻唱過，但編曲上走唔出原作嘅框框，但學而呢個版本卻與眾不同，輕快嘅節奏、輕描淡寫嘅演繹，感覺到歌詞中主角對愛情仍有所期盼，而唔係其他版本聽落咁絕望。一支長笛非常搶鏡，亦令首歌少咗 K 歌嘅感覺。

05. 我是不是該安靜的走開

聽完只有一個感覺，首歌都係啱女仔唱多啲，尤其是當你再聽番城城或 Leon 嘅演繹後 . . .

06. 愛如潮水

係我全碟嘅至愛之一，呢類歌絕對係學而嘅強項。編曲亦簡而清，全程只以一支結他作伴奏，只係於中及尾段加入一小段色士風吹奏，風格清新優雅。

07. 當你孤單你會想起誰

10 隻手指有長短，其實我唔鍾意呢首歌 (我指原曲)，感覺太過 K 歌，編曲平鋪直敘交行貨，聽一、兩次已經覺得厭。呢個版本呢？聽得出學而好用心去演繹，但伴奏嘅鋼琴全程好似同首歌格格不入，有啲魂不附體咁，純係個人感覺咋！

08. 你是如此難以忘記

我諗好多後生一輩嘅樂迷都未聽過呢首歌，梁朝偉經典之作嚟架！首歌本身嘅旋律已經好靚，學而呢個版本更注入咗爵士原素，以爵士五重奏的形式襯托出學而帶有點點 swing 嘅演繹，跟原曲一樣咁討好。

09. 心動 guitar version

係我全碟嘅另一首至愛，首歌其實好蝦人唱架！情緒嘅高低起伏變化頗大，仲要只係以一支結他作伴奏，唱功無番咁上下實力都 handel 唔到架！學而唱呢首歌令你深深體會到點為之觸動心靈嘅演繹。