不眠王子

清苗越南餐廳不知所謂永不幫襯

由不眠王子於 2009年10月01日發表人氣：558

電郵給朋友

今年未試過食一餐飯由坐低一直火滾到埋單 . . .

聽電台某飲食節目，有位名人推介 清苗越南餐廳 ，話嗰度嘅越南菜係最正宗嘅！上 Openrice 望望得幾個食評，應該係新開無耐，但幾晚經過都見得一、兩枱客咁奇怪所以無入，點知上個星期三入咗去就出事，事後再上網 check ，原來清苗前身就係喺 Openrice 劣評如潮嘅 西貢越南餐廳 ，同一地點、同一班人，換咗名同招牌再做生意 . . .

咁似消委會講嗰啲黑店 case 嘅？執完改過名再開番？

OK！入去一坐低，侍應放低一份 menu 俾我哋 share 睇，王妃睇先，唔夠 30 秒，侍應埋嚟問我哋想食啲乜嘢！我就答佢話轉頭先，隔咗一分鐘左右，佢又埋嚟再問一次，我見王妃仲未睇完 menu ，我就直情未睇，於是對佢話就得、好快 . . . 嚟到呢度都未有任何問題嘅！

到我正在睇 menu 時，侍應竟然催第 3 次，仲用好差嘅語氣話 :「你嗌得未呀？」

嘩 . . . 我 2 個呆咗，我哋坐低其實都唔夠 5 分鐘，店內又唔係坐滿人，只得 3 成滿，駛唔駛咁對我哋呀？

算！我照嗌嘢食，到啲嘢嚟到時，我就用部 DC 開始影相，突然有個侍應離遠大聲咁話 :「先生，呢度唔俾影相架 . . .」咁我依然好客氣問佢 :「我自己嗌嘅嘢食都唔影得相？」店員無回應我兼即時轉身行開 . . .

嬲到我呀！店內無寫住唔俾影相，就算唔俾，店員都唔應該咁嘅態度，連一句唔好意思都唔講，亦無行埋嚟細細聲勸告我，攪到好似捉小偷咁，大大聲指證我。

埋單行去收銀度俾錢，有個我估係老闆娘嘅物體問我哋覺得啲嘢食點、俾啲意見，我同王妃好齊心咁作無聲抗議，粒聲都唔出，俾錢、走人。

我係影咗牛腩煲咋！其他影唔到啦！

茄汁牛腩煲 ($65) 超搵笨！以為咁貴會俾啲靚坑腩我

一單還一單，我無中傷佢，有相你睇，牛腩一係就大大嚿肥羔、一係就好韌嘅腩肉，邊度值 $65 呀？

睇吓嚿肥羔 . . . 個茄汁亦只係水汪汪，一啲都唔杰身

香燒蔗蝦 ($45) 有 4 大隻，香噴噴、好好味，都算抵食