不眠王子

Cafe Golden 服務酒店級小小咖啡室

由不眠王子於 2009年07月12日發表人氣：547

電郵給朋友

星期六同王妃去咗賽馬會創意藝術中心行吓，我唔係龍友，但都喺座咁有藝術文化氣息嘅地方捐窿捐罅遊咗幾粒鐘，就連天台都唔放過，High 到呢 . . . 要即場 high 個 tea 歇歇啦！中心一樓有間 Starbucks feel 嘅咖啡室 Cafe Golden ，見格局幾優雅，一於入去幫襯吓！

咖啡室內得幾張 2 人枱，只可容納十幾人，環境尚算唔錯，尤其嗰張令人坐得舒舒服服嘅皮座椅。店外小露台亦放咗幾張枱，但最好唔好食煙破壞咁優雅嘅環境啦！

水吧面積唔算細，柔和嘅燈光襯托下猶如置身酒店嘆下午茶，但最令人印象難忘嘅，肯定係侍應生嘅慇勤服務，男侍應竟係蹲低身單膝跪喺客人旁邊聽候吩咐，喺呢類蚊型咖啡室都係第一次遇到咋！

歌劇院咖啡蛋糕 雖無精緻嘅賣相，但喺朱古力面層上所勾嘅 Opera 字樣有形有格，又會加番啲印象分，Opera 只係賣 $20 件，價錢尚算合理。

我鍾意 Opera 係因為佢嘅層次感夠晒豐富，呢件歌劇院咖啡蛋糕嘅水準絕對合格，朱古力同咖啡嘅味道相當香濃，入口軟綿綿。雖未至五星級酒店質素，但跟同類咖啡室比豪不遜色。

匈牙利熱狗 喺落單之前請先考慮以下 3 個條件 . . .

A. 你未食午飯

B. 你唔會一個人食，係會同朋友 share

C. 你本身好大食

如果你符合以上其中一項條件，就即管落 order 啦！

匈牙利熱狗賣 $22 個，以 size 論價，無人會覺得佢貴

睇吓隻熱狗大到 . . . 有半隻手臂嘅大半咁巨型，起碼有 10 寸長吧！對於未食 lunch 嘅我 . . . 都驚食唔晒！

食匈牙利熱狗當然係為咗佢嘅惹味辣肉腸啦！個包都咁大，條腸自然有番咁上下粗啦！食落包身暖烘烘幾軟熟，辣肉腸亦熱辣辣幾彈牙吓！若硬要挑剔嘅係配料只得幾片蕃茄略嫌單調，如果加埋洋蔥粒及酸瓜片就更 perfect