不眠王子

PizzaZaZA 品味 ● 又點只食 Pizza

由不眠王子於 2012年11月12日發表人氣：723

電郵給朋友

要數近期最人氣嘅食店，肯定非 PizzaZaZa 莫屬，唔少無 add 王子 facebook 嘅朋友仔問王子食過未，喺食評網站嘅排行榜排前列位置我知唔知 . . .

前一條答案係 : 食過，早喺 9 月初已去咗試菜。後一條答案係 : 唔知，因為我無睇嗰個滿佈打手嘅網好耐，而家就連班片糖食家、豬心食家為咗比賽嬴獎金，明明係試菜都作故仔話同朋友去、同家人去，Cheap 到爆 (試菜係唔計分的)，但最好笑嘅係，篇篇食評都係食同一堆菜式 (又會咁啱嘅！)。

Anyway, 講番 PizzaZaZa 吧！雖然睇店名會估佢係主打 pizza ，但其實成個意大利菜 menu 都係周身刀、張張利，由簡單到一籃麵包，到最後享受嘅甜品，以至餐後嘅一杯咖啡，你必定會感覺到，餐廳老闆及廚師團隊對食材嘅一份熱誠及堅持。就連店內幾位侍應生嘅服務水準亦達到酒店級數，王子食完第一次已經對這裡印象難忘。

所以，非出最高評級【王子印章】不可。

PizzaZaZa 店子小小，座位不多，只坐到 30 人左右但格局精緻，坐得亦舒服。店子盡頭會見到部畫面黃黃哋嘅 "大電視" ，現場直播一班廚師忙碌咁為客人預備各種菜式。

裝飾架上突然發現有條潮爆品牌 RMC 嘅牛仔褲，咦？有店方名字繡在褲上嘅！原來此條潮牛係老闆娘為店內員工所訂嘅制服，唔知佢哋知唔知 RMC 最普通嘅一條牛仔褲都要過千蚊條呢？

餐枱椅以冷色調型格為主，俾人有實而不華嘅感覺。

PizzaZaZa 亦有自家品牌嘅啤酒，當然唔係店方自己釀製啦！

當日試菜嘅仲有 KC 、Isaac 、大少奶及 Vanlily 幾位人氣博客。

麵包籃 ($5 / 位) 可能會令部份朋友奇怪，麵包都要收錢？但我覺得合情合理，唔駛錢，放一籃麵包喺度，你未必會珍惜，一片都唔食。象徵式收幾蚊，心態上要俾錢，自然會食晒，何況這裡的麵包係真材實料自家做，好食！當然唔會計較俾幾蚊了。

和牛肉薄片配芝士, 火箭菜及檸檬汁 ($118) 係唔少意大利餐廳都有得供應嘅前菜，但牛肉揀得好、切得夠薄夠靚，就唔係間間做到了。

和牛肉片得夠薄夠工整，入口感覺鮮味十足，伴以 parmesan 芝士及火箭菜一齊食，Fresh 到不得了。

軟心蛋配磨菇 , 薯蓉及黑松露菌汁 ($108) 單係睇名字都想像得到有幾香噴噴了。

流心嘅日本溫泉蛋滑溜富蛋香，伴以香噴噴嘅磨菇及黑松露菌汁，連蛋白都香味四溢，將蛋黃撈埋薯蓉放入口，Sooooo yummy！

意大利海鮮湯 ($118) 料鮮自然熬得出靚湯，點解有啲人要落雞粉、雞精、雞汁？因為用啲食材唔新鮮囉！PizzaZaZa 用嘅海鮮夠新鮮兼係靚貨色，而湯頭更用慢火細熬而成，鮮甜清香，唔好飲至奇。

意大利煙肉全麥薄餅 ($158) 係店中兩款全麥薄餅嘅其中之一，小小店子竟採用價值三十多萬嘅火山石焗爐，有啲估唔到吧？餅底用小麥粉製成，比一般 pizza 更鬆脆亦更高纖，食 pizza 都一樣可以食到好健康的。

煙肉都係由意大利直送，埋藏喺厚厚嘅香噴噴水牛芝士當中，肉帶芝士香，而芝士又透出肉汁香味，惹味到不得了。

牛肝菌水牛芝士全麥薄餅 ($148) 係另一款全麥薄餅，配搭簡單但坊間少見，值得一試。

牛肝菌配上水牛芝士去焗 pizza ，香氣撲鼻到侍應未捧到埋嚟已經知，加埋脆卜卜嘅全麥餅底。麥香 + 菌香 + 芝香 = 頂級嘅味覺享受。

女皇薄餅 ($158) 即係意大利歷史悠久嘅 Margherita Pizza ，若嫌配料單調的話不妨向店員要求斬料，加兩隻日本蛋 ($20 咋！menu 無架！)，信我，口感即時提昇，正好多架！

這裡嘅 Pizza 係薄批，以火山石爐即叫即焗，外香脆、內鬆軟。

加隻日本溫泉蛋 (中間那片) ，蛋黃滲落薄餅上 . . . Oh~ 命都無呀！我估，無乜人識得咁樣食 pizza ，你真係要試試。

墨西哥辣肉腸薄餅 ($138) 睇賣相好似無乜特別，但其實係一款帶有幾分辣勁嘅薄餅，因餡料中加入咗 Jalapeno 墨西哥辣椒，連埋辣肉腸一啖咬落去，夠晒刺激呀！

自家製雲吞釀布袋芝士配珍珠雞肉醬汁 ($158) 滑滑嘅雲吞皮包住同樣滑滑嘅忌廉芝士，其實唔配肉醬就咁食都得，但夾埋一齊食感覺上係無咁膩嘅！

波士頓龍蝦墨魚汁意粉配牛油果 ($298) 可以講係物有所值，新鮮波士頓龍蝦拆肉，份量唔少且粒粒爽滑鮮甜，唔會煮到全熟令肉質變嚡。

講開龍蝦，有時見到啲食評鬼殺咁嘈鬧某間餐廳啲龍蝦未熟，仲話作為主婦嘅佢咁大個女都未食過。Well！全熟嘅龍蝦，肉質一定嚡兼無咁 juicy ，你食埋我嗰份吧！其實新鮮嘅龍蝦煮到 7 成熟係最 perfect ，8 成熟都仲可以叫 OK！再熟啲就唔好食了。

海膽意大利飯 ($218) 已成為店裡的人氣招牌菜，坊間一般日本料理嘅海膽飯，只係於飯上放一小口海膽，已經要百幾元一碗，這碟海膽意大利飯雖然賣 $218 ，但除了啖啖鮮甜海膽，就連每一粒飯都盡是海膽精華，你見到相中整碟金黃色嘅意大利飯並唔係用咗咖喱汁，亦唔係用咗南瓜汁，而係濃稠嘅海膽汁，每一碟都用上整板海膽去烹調，單係睇相都已經夠勾魂奪魄，何況係放入口？意大利飯煙煙韌韌好咬口，夠 al dente 兼渾身是「膽」，美味得無懈可擊。

雲喱拿雪糕配果仁 , 朱古力及香滑濃縮咖啡 ($68) 不比任何甜品專門店遜色，靈魂係嚟自香味撲鼻咖啡，先食一口充滿果仁嘅雪糕，然後淋上咖啡再試，係口感不同嘅雙重感受。

雪糕食至最後，部份溶於咖啡之中，一口喝盡，係第三重味覺享受。

暖朱古力撻配雜錦草梅 ($88) not bad ，只係相對其他精彩嘅甜品，輸咗個馬鼻。朱古力撻甜度適中朱味香濃，其實都幾好食架！

意式芝士蛋糕配咖啡汁 ($68) 仲記得當日放相上 Facebook 時，用「輕如浮雲，正到無朋友」去形容，印象中，香港嘅甜品店鮮有咁高水準嘅 Tiramisu ，就算係酒店亦無幾多間做到如斯水準。贏嘅，除咗廚師嘅豐富經驗，仲有不計成本嘅優質材料，喺地產霸權下，食店用次一等嘅材料去製作美食，已係無可奈何嘅事實。

Tiramisu 芝士軟滑，放入口，溶咗！再放入口，又溶咗！好想 . . . 可以不斷咁放入口，不斷咁溶咗！咖啡酒香而唔會太濃，太好味，唔需要再形容落去。