不眠王子

音樂人生為人父母者非看不可

由不眠王子於 2009年07月05日發表人氣：443

電郵給朋友

早排王子喺 Blog 收到留言，獲邀出席《音樂人生》嘅優先場。其實自己一向對人物傳記式嘅電影提不起興趣，但當我細心睇過官方網站 http://www.c3kings.blogspot.com/ 後，我完全改觀了 . . .

可能係太多地方有共鳴吧！例如主角跟自己一樣，從小到大對音樂都有一份執著。如果將王子半世人嘅遭遇拍成電影，我諗 . . . . 都幾精彩架！

6 月 29 日，一早去到百老匯電影中心等待攞戲票，所謂一早，係比入場時間早到咗個幾鐘頭，好耐無試過咁期待睇一部電影啦！

《音樂人生》嘅導演張經緯，正正係《天水圍的夜與霧》嘅編劇，呢套戲係講述香港土生土長嘅鋼琴神童 KJ ( 黃家正 ) ，由 02 年 11 歲到 08 年 17 歲嘅成長傳記，導演用咗 6 年時間，深入拔萃校園、以至 KJ 嘅家中，全面而真實咁俾大家睇吓一個天才嘅內心世界。

如果你本身鍾意聽音樂，呢套戲一定唔會悶親你，因為喺戲內你會不斷欣賞到 KJ 高超嘅彈奏造詣，但另一方面你會發現天才背後其實係一個悲劇人生 . . . 一個生長於富裕家庭嘅小朋友，由細到大同哥哥及妹妹被父親「迫」去學唔同嘅樂器，因為天資比兄妹聰敏得多而更受父親嘅寵愛，表面上係萬千竉愛於一身，但事實上 無敵係最寂寞、天才係最孤獨！身邊嘅同學以至自己嘅哥哥都覺得佢好難相處，而做父親嘅根本一啲都唔了解自己兒子嘅內心世界，正如 KJ 喺最後訪問中提到，玩音樂太注重比賽，好厭惡每次食飯都只係講音樂 . . .

去到電影末段，一切謎團解開，KJ 原來生長喺一個唔健康嘅家庭之下，佢喺鏡頭面前好主動咁話俾全世界嘅人知，究竟發生乜嘢事，感覺似係要向父親嘅所出所為作出最大嘅報復，將家醜公諸於世 . . .

《音樂人生》絕對係一部觸動心靈嘅電影，好值得呢一個年代嘅父母入場睇完，再作出反思。我自己都睇到眼濕濕，覺得主角 KJ 好可憐，天才咁又點？身邊無一個人可以同佢分享到喜與憂。

我真係好希望香港所有為人父母嘅去睇睇呢部戲，因為我相信香港有無數咁多個 KJ ，甚至你屋企已經有一個或以上嘅 KJ ，究竟你哋「想」自己嘅仔女所行嘅係乜嘢嘅路呢？

4 歲識講流利英文，6 歲識玩電腦，10 歲已經考到 8 級鋼琴 . . . . 咁嘅人生，小朋友係咪真係覺得開心呢？

《音樂人生》喺 7 月 16 日開始只會喺百老匯電影中心放映。頭幾場已經滿座，而家已加場至 10 場，詳情及點預訂門票可以到官方網站睇吓 : http://www.c3kings.blogspot.com/