不眠王子

賣豬仔特式燒烤坊分店亦出色燒味最好食

由不眠王子於 2012年10月30日發表人氣：511

電郵給朋友

平日跟王妃兩個人食飯，較少去小菜館，因為得兩小口子，唔可能點太多菜式。某些菜式又會因份量太多而唔敢點，例如食片皮鴨或乳豬咁，兩個人點食呢？係！乳豬係可以點例牌，但點得例牌就要預咗唔係即叫即燒。部份香港人好得意，自己夜咗去食飯，又投訴碟乳豬嘅皮唔夠脆，叫碟例牌又投訴碟乳豬唔係即叫即燒。

所以 賣豬仔特式燒烤坊 開咗咁耐，我一直未試過 (朋友打包俾我嘅唔算)，直到佢哋最近喺原址附近開咗間分店，咁啱又有朋友仔約埋王子去，於是一行 7 人，探探新店虛實。

賣豬仔 新店雖然又係得幾張大枱，但地方比舊店大足足一倍，可以容納更多食客，坐得亦相對舒服，店員亦幾好招呼。馳名嘅醬燒越南 BB 豬水準跟舊店亦唔覺有分別 (以原隻計)。

歡樂套餐 幾乎有齊晒大家嘅目標，7 個人 share 6 人餐，其實都夠食的，但套餐 $998 抵嗎？跟散叫分別大嗎？計過之後發現，抵咗 6 罐飲品，都 OK 啦！

鹵水豬仔腳 ($48) 係獨立點的，亦係店中名物，必點！

鹵水豬仔腳爽滑到不得丁，皮嫩骨軟，送酒一流。

鹵水四式拼盤 包括海蜇、掌翼、豬耳及豬脷配以涼拌青瓜，其實我估鹵水配料可以自選的，落單前不妨問問店員吧！

脆皮香草燒雞 單點都係 $108 ，列入套餐之內亦交足功課。

香草燒雞色澤均勻，醃得惹味，皮薄香脆少脂肪，雞肉嫩滑無比，以冰鮮雞嚟講製作得非常有水準。

醬燒越南 BB 豬 單點全隻都係 $498 ，想食最正嘅 BB 豬，我會見議至少叫半隻 ($258) ，起碼都係即叫即燒嘛！

BB 豬嚟自越南，色澤均勻燒得靚 . . . 到好想帶個豬頭返屋企，店員係我哋享用完豬身後，主動話可以攞個 BB 豬頭入廚房俾師傅再細分成一碟，一般酒樓真係睬你都傻，唔好以為個頭無乜嘢食呀！大家都不知食得幾津津有味。

乳豬嘅芝麻皮香脆又夠薄，下面嘅脂肪層 . . . WoooW！充滿罪惡感，但無咗佢，肉質又唔會軟腍得嚟充滿豬油香嘛！

泰式燒烏頭魚 單點每條 $88 ，廚師更釀入大蔥、香茅等大量泰式配料令魚肉更加香噴噴。不過，條魚偏多細骨，比好多泰國菜館食到嘅燒烏頭魚還要多骨，而鮮味亦欠奉。

烏頭魚也燒得過咗龍，魚肉有點嚡，得個香字，希望係個別事件啦！

什錦串燒 有 4 款共 8 串，套餐所選嘅串燒平均每串 $13 - $22 ，其實店內供應嘅串燒接近 30 款，都幾抵食架！