不眠王子

點止冰冰隱世小店甜品精

由不眠王子於 2012年10月17日發表人氣：1081

電郵給朋友

自從王妃幾個月前轉咗去鰂魚涌工作，我喺這區嘅開飯次數自然密咗，這裡的地產霸權汚染指數比較低，所以有唔少值得推介嘅特色小店。幾個月前有間都幾隱世嘅 點止冰冰 開咗，話佢隱世，因為佢位處橫街嘅工廈區內，全條街就只得這間店子 (同街嘅點心店也準備搬走了)，我都係無意中喺大街嘅街口發現佢哋嘅易拉架廣告至好奇走入去橫街睇睇咋！

店小，開得隱敝，卻估唔到老闆竟然係嚟自四季酒店嘅稻菊，雖然喺短短一個月內幫襯過 3 次，但 sorry ，我 feel 唔到有任何稻菊嘅影子，咁即係唔好食？又唔係嘅！只係覺得，講咗係稻菊出身咁又點呢？你又唔係開日本料理，Right？

而家啲食店唔好動不動就話自己或廚師嚟自某某著名食府，每次見雜誌介紹某位大廚曾任職 A B C D E 咁多間食府，我就忍唔住笑，真係有料嘅，就唔會不斷轉工啦！係有本事嘅！人氣自然會一傳十、十傳百咁湧埋嚟！

點止冰冰 格局有點過份簡約，牆上就只得這幾幅 B B 掛畫，而店子小小只得幾張枱，如果爆場都幾迫架！但我每次去都係只得小貓三兩隻，其實小店有唔少特色美食，係值得專登嚟捧吓場，尤其是甜品，睇得出花過唔少心思。

店子門外亦放咗幾張枱，相信係俾吸煙嘅朋友吧！

西瓜沙冰 ($25) 都幾大樽亦打得幾蓉，糖水當然有加但唔算多。

荔枝沙冰 ($25) 就有少少過甜了。

黑咖喱魚旦 ($25 / 10 粒) 坊間少見，要試要試，包無後悔。

平日食嘅咖喱魚蛋，辣度瞬間即逝，但黑咖喱就辣得比較持久，夠晒刺激。而魚旦亦質感一流，肉質有彈性，唔似得街邊或 7 仔啲魚旦咁粉，成件事加埋就相當好食。

咖喱吉列芝士豬扒飯 ($58) 這個價錢已包前菜及熱飲一杯，抵過你去集團快餐店食個無質素嘅飯餐。前菜可以揀七味餃子或中華沙律，熱飲轉凍飲加 $2。

七味餃子皮厚餡唔靚兼且唔熱，講完。揀中華沙律吧！

咖喱吉列芝士豬扒飯反而有驚喜，飯應該係用日本米，兩大件豬扒炸得金黃，入口鬆化。咖喱汁夠濃稠，味道微辣中帶點甜，相當對辦。

吉列豬扒已經好得，加埋香噴噴嘅流心芝士汁，撈落咖喱飯一齊食，真係無得頂呀！

漢堡扒芝士撈稻庭烏冬 ($68) 亦係包前菜及熱飲一杯，單係賣相已經夠先聲奪人。

你睇隻碟幾型，用嚟配芝士撈稻庭烏冬系列簡直係天作之合，俾你感覺到芝士汁多到瀉出嚟嘅效果。