不眠王子

由不眠王子於 2009年05月02日發表人氣：828

電郵給朋友

梅窩都有冰室？麥生記冰室 真係陌生 . . . 隱世到連 Openrice 都無佢嘅資料，我係咪好厲害呢？佢喺梅窩圖書館附近咋！我其實無意中喺佢後門經過，俾一陣香濃到殺死人嘅咖啡味吸引到即刻兜去前門睇吓至發現佢咋！

睇個格局，我估麥生記都有好多年歷史啦！全店只得好 nice 嘅老闆 one man band 一腳踢，可能上個周末落大雨嘅關係呱！餐牌上全係一般冰室嘅出品，無乜特別招牌美食，但呢度嘅咖啡真係正到 . . . 都唔知點形容好

熱咖啡 真係 10 個正，只係 $12 杯。唔係講笑，真係香濃到離遠都聞得到，唔知佢係用邊隻咖啡豆呢？呷一啖，甘、香、醇喺齊度，成個人即時醒神晒，下次一定要試吓飲齋啡

凍咖啡 一樣咁正、一樣咁香濃，下次再嚟真係唔知要熱定凍好

油多唔係單點，係下午茶餐「跟」嘅 . . . 跟？係呀！油多餐只係 $15 就歎到杯咁正嘅咖啡，擺明妹仔大過主人婆啦！單點咖啡要 $12 ，多 $3 就有件油多，緊係食餐啦！

油多嘅味道其實都唔錯嘅！起碼熱烘烘得嚟包身又夠軟熟，唔會俾隔夜貨你，呢幾蚊絕對物超所值。

電話 : 2984 8365 平均消費 : $12 - $17 / 位

地址 : 大嶼山梅窩涌口街 38F 地下

搜尋王子的文章