不眠王子

由不眠王子於 2009年04月06日發表人氣：0

就算你未曾去過有幾十年歷史嘅 中國冰室 ，都應該曾經喺唔少套電影之中見過以下場景 . . . 例如 PTU . . .

警長阿展同埋佢嘅下屬嚟到食宵夜 . . . .

無幾耐佢老友肥沙嚟到，拉佢埋卡位嗰邊傾大鑊嘢

各人聽到跟踪肥沙嘅 Madam 張殺到，開始緊張 . . .

Madam 張準備上嚟 . . . 肥沙決定由後門閃 . . . 其他人？

咪好似我咁繼續食、食、食囉！

午餐 C 有牛油餐包 x 雞肉奄列 x 火腿通粉 x 飲品 = $21

雞肉奄列 雖然無乜特別，但坊間好少用嚟跟餐囉！

火腿通粉 喺呢個年代仲用咁大塊火腿、而唔會係咁意切幾條幼絲就算，呢啲老舖算有良心咯！

凍奶茶 絕對係 10 個 good ，奶滑茶香，盡顯老師傅功架

冰係自家刨、唔係用強記冰粒，唔會落半杯搵你笨

午餐 A 有多士 x 腸仔煎蛋 x 火腿通粉 x 飲品 = $21

腸仔煎蛋 亦無乜特別，正正常常合格水平囉！

熱奶茶 當然又係 10 個 good ，呷一啖會知道自己係飲緊奶茶、而唔係一杯唔知係乜嘅熱嘢 . . .

紅豆冰 係每次嚟嘅指定動作，坦白講，咁高質素嘅紅豆冰喺坊間已經賣少見少，咁大杯都係 $14 咋！

紅豆冰 仍然用傳統嘅刨冰，市面仲有幾多間茶餐廳會咁做？呢個至係真材實料，後生嗰班鬼知係寶咩 . . .

紅豆大大粒、煙韌好咬口，迫爆全個杯嘅 4 份 3 咁多

睇清楚！紅豆攪到起晒沙得嚟要濃而不濁至稱得上一杯上佳嘅紅豆冰，下次你飲開紅豆冰不妨睇吓攪完後有無咁靚啦！

鳳凰奶糊 係將近失傳嘅傳統甜品，記得捧場，$20 咋

鳳凰奶糊係 50 年代舊式甜品，先打勻蛋黃後撞奶再煮成糊狀，最後打隻生雞蛋落去，其實唔算難整，只係又要落足料、又要花功夫同時間去整，但又賣唔到太貴 . . . 邊夠燉奶、燉蛋咁好搵？

王子當然知仲有邊間甜品店都食到鳳凰奶糊，但有咁重蛋香、甜度適中唔過火、奶糊杰身呈糊狀唔會水汪汪 . . . 就真係無幾多間做到啦！

電話 : 2392 7825 平均消費 : $15 - $25 / 位

地址 : 旺角廣東道 1081 號地下

0 個留言

多功能吃喝玩樂寫 Blog 人，Blog累積瀏覽人次突破 1960 萬