不眠王子

趙學而﹝聽﹞- 你今日買咗未呀？

由不眠王子於 2008年12月10日發表人氣：428

電郵給朋友

今日隻碟面世，係時候出呢一篇啦 . . . 近排每晚 keep 住聽呢隻﹝聽﹞，坦白講，就算無份參與製作，我一樣會選呢張碟為近年至愛嘅本地製作，更何況自己有份參與呢

本地樂壇唱得好嘅歌手買少見少，學而嘅唱功有幾高水準大家都有目共睹，唔需要我再喺度講。大家聽吓而家啲女歌手出 CD ，講個 make-up 幾靚、啲衫係阿乜水乜水 design 、個頭喺邊度 set . . . 講點樣演繹首歌？得 1 個半個囉！

一唱現場仲好笑，走音、懶音、唔夠氣、五音不全 . . . 乜都出晒嚟！最難得係有班粉絲照樣支持，真係佩服到五體投地 . . . 學吓聽聽乜嘢叫做用心去演繹啦！

01. 我可以抱你嗎

呢首國語歌短短哋 3 分鐘，編曲走 broadway jazz 嘅路線，旋律輕鬆易入耳，中段嘅鋼琴 solo 非常正

02. 長夜 My Love Goodnight

單聽頭 15 秒，一定估唔到原來唱呢首歌，Bossa Nova 嘅旋律俾人一種輕鬆寫意嘅感覺，跟原曲嗰份孤寂無奈嘅意境好唔同，如果原版本中葉倩文嘅演繹似一個寂寞少婦。咁學而演繹呢首歌就似個情竇初開嘅少女，聽佢唱頭一段其中一句 "親親照片輕輕說 My Love Goodnight" 個 night 字幾咁輕柔幾咁 sweet。中段結他 solo 散發嘅每粒音色亦甜到漏，同原版比，成首歌可以用脫胎換骨嚟形容。

03. Be Your Love

王子嘅至愛三甲之一，如果你有聽過原曲，聽學而呢個版本一定會有耳目一新嘅感覺，個人認為新版本喺演繹上更勝原唱者，學而把聲靚到不得了，而中段支長笛玩 solo 亦勁正。

04. 情深緣淺

雖然珠玉在前，但學而喺演繹上唔會輸蝕比原唱者，尾段嗰支色士風玩咗相當長時間，鬼咁搶鏡。

05. 曾在你懷抱

編曲上較為平淡，隻歌唔係唔好聽，只係相對其他作品無咁多驚喜而矣！

06. 許願樹

絕對係別開生面嘅一個演繹，連幾位外籍嘅伴奏樂手亦粉墨登場，唱埋和音，全首歌嘅旋律清新悅耳，滲有少少拉丁風味，編曲好有 80 代風格。

07. 對一個人愛錯

印象最深刻一定係由 2 分 50 秒歌唱部分完結開始，長達 2 分鐘嘅樂器 super jam ，本地嘅編曲有幾可會俾樂手有咁大嘅自由度玩咁長時間嘅即興先？

08. 某月某夜

一個字 :「清風送爽」